Konsellu Seguransa hala’o votasaun ba dala-ualu ba kandidatu sira ba pozisaun Sekretáriu-Jerál ONU tuirmai
DILI, 06 Novembru 2026 (TATOLI) –– Konsellu Seguransa hala’o ona votasaun preliminár ba dala-ualu iha loron-kinta kona-ba kandidatu sira ba kargu Sekretáriu-Jerál ONU tuirmai.
“Votasaun preliminár ba dala ualu konklui ona,” dehan Sanita Pavluta-Deslandes, Embaixadora Letónia nian iha ONU—nasaun ida ne’ebé kaer prezidénsia rotativa Konsellu Seguransa nian ba fulan-Novembru.
Kandidatu ida-idak sei hetan informasaun kona-ba rezultadu votasaun liuhosi reprezentante permanente sira hosi Estadu-membru sira ne’ebé nomeia sira. Prezidente Asembleia-Jerál ONU nian mós sei hetan notifikasaun katak votasaun preliminár hala’o ona, hatete hosi Pavluta-Deslandes ba jornalista sira hafoin konkluzaun hosi votasaun sekretu.
Konsellu Seguransa nia votu preliminár sira ba kandidatu sira ba Sekretáriu-Jerál mak konsulta informál sira, ne’ebé hala’o iha odamatan taka nia kotuk, ho objetivu atu avalia viabilidade hosi kandidatu ida-idak. Rezultadu sira la fó-sai ofisialmente.
Liuhusi votasaun sira-ne’e, Konsellu Seguransa hili kandidatu ida atu rekomenda ba Asembleia Jerál hodi hetan nomeasaun nu’udar Sekretáriu-Jerál ONU tuirmai.
Komprende katak membru sira Konsellu nian simu boletín votu ida ba kandidatu ida-idak, ne’ebé lista indivíduu nia naran tuir fali ho opsaun tolu: “enkoraja,” “la enkoraja,” no “la espresa opiniaun.”
Atu asegura konsellu nia rekomendasaun, kandidatu ida tenke hetan pelumenus votu “apoiu” neen no laiha votu “kontra” hosi konsellu nia membru permanente lima.
Iha votasaun preliminár daneen, ne’ebé hala’o iha loron 16 fulan-Outubru, boletín votu sira hetan kódigu kór hodi distinge votu sira hosi membru permanente sira hosi sira hosi membru la’ós permanente sira.
Maibé, ba votasaun preliminár ba dala hitu iha loron 30 fulan-Outubru, no votasaun ba dala ualu ne’ebé hala’o iha loron-kinta, membru sira konsellu nian fila fali ba uza boletín votu sira lahó distinsaun sira hanesan ne’e, hafoin kandidatu foun sira tama iha korrida.
Lana Nusseibeh, diplomata ida hosi Emiradu Árabe Unidu no eis-embaixadora nasaun nian iha Nasaun Unida, hamutuk ho korrida hafoin ronde daneen. Eis-Ministru Negósiu Estranjeiru Turkia nian Feridun Hadi Sinirlioglu—ne’ebé agora daudaun serbisu nu’udar Sekretáriu Jerál Organizasaun ba Seguransa no Kooperasaun iha Europa—tama iha konkursu hafoin ronde ba dala-hitu.
Aleinde Nusseibeh ho Sinirlioglu, kandidatu na’in-neen seluk partisipa iha votasaun preliminár ne’ebé hala’o iha loron-kinta ne’e: Ivonne A-Baki, eis-ministra no diplomata ekuatorianu; Maria Fernanda Espinosa, eis-Prezidente Asembleia Jerál ONU nian no eis-Ministra Negósiu Estranjeiru no Defeza Ekuadór nian; Rafael Grossi hosi Arjentina, atuál Diretór Jerál hosi Ajénsia Internasionál Enerjia Atómika nian; Rebeca Grynspan, eis-Vise Prezidente Costa Rica nian no atuál Sekretária-Jerál Konferénsia Nasaun Unidas nian kona-ba Komérsiu no Dezenvolvimentu (UNCTAD); Olara Otunnu husi Uganda, eis-Sub-Sekretáriu-Jerál ONU nian; no Carolyn Rodrigues Birkett, Reprezentante Permanente Guyana nian ba Nasaun Unida.
Tuir rezultadu sira ne’ebé mosu, Grynspan lidera votasaun Kinta-feira nian, hetan votu “apoiu” hamutuk 12 no votu “falta apoiu” tolu. Tuir nia maka Grossi, ne’ebé hetan votu “apoiu” neen, votu “laiha apoiu” haat, no votu rua “la espresa opiniaun”.
Mandatu hosi sekretáriu-jerál ONU nian, António Guterres, remata iha tinan ne’e nia rohan. Ninia susesór tuir planu sei simu pose iha loron 1 fulan-Janeiru tinan 2027.
Notísia relevante: Konsellu Seguransa ONU hala’o votasaun informál dalimak ba kandidatu sira ba Sekretáriu-Jerál
Fonte: Xinhua
