Konsulta masál relembra sakrifísiu juventude Loriku Asswa’in 12 Novembru

DILI, 06 Novembru 2026 (TATOLI)–Ministériu Juventude, Desportu, Arte no Kultura (MJDAK) realiza konsulta masál ba juventude sira, hodi relembra fali sentidu luta no sakrifísiu Loriku Asswa’in sira iha 12 Novembru 1991.

Diretór Jerál Juventude MJDAK nian, Mário Tilman, hateten konsulta ne’e importante atu foti sentidu husi juventude sira ne’ebé partisipa iha prosesu luta ikus nian, balun tenke fakar raan no balun mate.

“Importánsia husi konsulta ida ohin ne’e atu relembra de’it sentidu fakar raan iha tempu ne’ebá. Atu hatete katak sira-nia mate mak ita moris,” Mário Tilman hateten ba jornalista sira iha Salaun Nahe Biti Boot MJDAK, ohin.

Nia hatutan, ho moris ne’ebé hetan husi sakrifísiu ne’e, juventude presiza iha saúde ne’ebé di’ak hodi kontinua valoriza luta ne’ebé juventude sira halo iha tempu ne’ebá no prepara kondisaun hodi kontribui ba dezenvolvimentu.

Konsulta masál ne’e hala’o de’it ba loron ida. Médiku sira ne’ebé fó atendimentu mai husi Ministériu Saúde, liuliu husi Ospitál Nasionál Guido Valadares (HNGV), no mós husi FALINTIL-Forsa Defeza Timor-Leste (F-FDTL).

“Konsulta masál ne’e ba ohin loron de’it,” nia dehan.

Tuir Mário Tilman, komemorasaun Masakre 12 Novembru hahú daudaun ona, tanba nia sekuensia hahú kedan husi Monumentu Sebastião tanba nia prosesu luta ne’e hahú husi fatin ne’eba.

Aleinde ne’e konsulta masál ne’e, nia dehan, sei iha atividade sira seluk tan hodi komemora Loron Masakre Santa Cruz hanesan kalan reflesaun.

Ba komemorasaun Masakre 12 Novembru, Mário Tilman esplika katak iha parte rua mak iha nível nasionál ne’e mak joven sira jerasaun 12 Novembru organiza hela, ida seluk mak iha nível postu ne’ebé organiza husi sentru juventude sira.

Jornalista : Hortêncio Sanchez

Editór        : Cancio Ximenes