PR Ramos-Horta agradese apoia Koreia Súl ba dezenvolvimentu Timor-Leste
SEOUL, 06 Novembru 2026(TATOLI)-– Prezidente Repúblika, José Ramos-Horta no Prezidente Repúblika Koreia Súl, Lee Jae Myung, hala’o enkontru bilaterál iha Palásiu Cheong Wa Dae (Blue House), Seoul hodi agardese ba apoia tomak ba dezenvovlimentu Timor-Leste.
Enkontru ne’e, marka vizita ofisiál bilaterál dahuluk husi Xefe Estadu Timor-Leste ba Koreia Súl, dezde nasaun rua estabelese relasaun diplomátika iha tinan 2002, no hala’o molok selebrasaun tinan 25 relasaun diplomátika iha tinan 2027.
Hafoin enkontru, Prezidente Lee Jae Myung hato’o boas-vindas no agradese ba vizita ofisiál husi Prezidente José Ramos-Horta nian.
“Enkontru ohin sei sai oportunidade atu reafirma fali relasaun istórika no ligasaun espesiál ne’ebé ita-nia nasaun rua iha ona, no loke kapítulu foun ida iha relasaun bilaterál entre ita-nia nasaun sira,” dehan Prezidente Lee Jae Myung.
Iha fatin hanesan, Prezidente Ramos-Horta reflete kona-ba amizade metin no istórika ne’ebé liga Timor-Leste ho Repúblika Koreia Súl.
“Importante tebes atu ita konsidera oinsá mak ita bele haforsa tan parseria no kooperasaun entre nasaun rua, liuliu iha área empregu, teknolojia, investimentu no dezenvolvimentu públiku,” dehan Xefe Estadu Timor-Leste.
Prezidente Ramos-Horta dehan kontente tebes ho oportunidade sira ne’e bele dezenvolve hamutuk liuliu agora Timor-Leste hahú kapítulu foun ida hanesan membru ASEAN ba 11.
“Situasaun foun ida-ne’e sei loke dalan ba oportunidade kooperasaun no parseria ne’ebé luan liután entre Timor-Leste no Repúblika Koreia Súl,” nia dehan.
Agradese Kontribuisaun Koreia Súl
Prezidente Ramos-Horta agradese tebes ba kontribuisaun ne’ebé Repúblika Koreia Súl halo durante tempu naruk ba prosesu dezenvolvimentu Timor-Leste nian.
Kontribuisaun hirak ne’e hahú husi apoiu ne’ebé forsa manutensaun dame Koreana sira fó durante períodu tranzisaun ba independénsia, inklui servisu husi parseiru dezenvolvimentu Koreanu sira, voluntáriu no instituisaun oioin.
“Esperiénsia estraordinária Repúblika Koreia Súl nian iha prosesu rekonstrusaun nasionál no transformasaun ekonómika kontinua sai hanesan lisaun valiozu ba Timor-Leste iha esforsu atu promove dezenvolvimentu nasionál no harii futuru ne’ebé sustentável,” katak Xefe Estadu.
Nia mós hato’o apresiasaun ba partisipasaun no envolvimentu ativu husi instituisaun akadémika, reprezentante sosiedade sivíl no individuál sira ne’ebé halo ona kontribuisaun importante ba manutensaun dame no kooperasaun internasionál.
“Interkâmbiu hirak-ne’e sai hanesan lembransa ida katak relasaun entre ita-nia nasaun rua la limita de’it ba relasaun entre governu sira, maibé iha baze metin iha amizade, solidariedade no ligasaun entre povu Timor-Leste no povu Repúblika Koreia,” nia afirma.
Kooperasaun Konkretu
Prezidente Ramos-Horta hatete, nasaun rua iha potensiál boot atu aprofunda tan relasaun bilaterál ne’e.
Nune’e, Xefe Estadu hein katak diskusaun ne’ebé hala’o ohin bele transforma sai kooperasaun konkretu no prátiku, liuliu iha área dezenvolvimentu kapasidade no abilidade juventude sira-nian, hametin oportunidade empregu, promove investimentu estranjeiru, no aproveita esperiénsia Repúblika Koreia nian iha área siénsia, teknolojia no inovasaun.
“Ho esforsu hamutuk, ami fiar katak relasaun entre Timor-Leste no Repúblika Koreia sei kontinua dezenvolve no sai forte liután iha futuru,” nia dehan.
Xefe Estadu hato’o agradese ba akollamentu ne’ebé jenerozu, amizade no apoiu ne’ebé Repúblika Koreia Súl fó kontinua durante tempu naruk ba Timor-Leste.
Ramos-Horta mós hato’o parabéns ba Prezidente Lee Jae Myung tanba hetan mandatu Prezidente liuhusi eleisaun iha tinan kotuk.
“Vitória ne’e lori esperansa no inspirasaun boot ba nasaun hotu, liuliu ba ita-nia nasaun rua ne’ebé iha esperiénsia hamutuk iha esforsu atu preserva demokrasia, hametin Estadu Direitu no promove estabilidade no dezenvolvimentu nasionál,” nia konklui.
Hafoin enkontru bilaterál, líder na’in rua asiste serimónia asinatura Memorandum of Understanding (MoU) no halo konferénsia imprensa konjunta iha Cheong Wa Dae.
Jornalista: Anito Soares
Editór : Florencio Miranda Ximenes
