Alargamentu estrada iha Bemori sei afeta uma-kain 200-resin
DÍLI, 09 Novembru 2026 (TATOLI) – Xefe Suku Bemori, Francisco Sequiera, informa katak projetu alargamentu estrada iha Suku Bemori, Munisípiu Díli, sei afeta uma-kain hamutuk 200 resin, ne’ebé hela iha Aldeia Ailele Hun, Bemori Central no Bemori Centro. Prosesu ne’e sei hahú iha inísiu tinan 2027.
Francisco esplika katak, iha fulan Outubru liubá, ekipa konjunta husi Ministériu Obras Públikas (MOP) no Sekretaria Estadu Asuntu Toponímia (SEATOU) hasoru malu ho nia atu hato’o informasaun kona-ba planu atu hala’o prosesu despeju administrativu ba uma-kain sira ne’ebé hela iha área ne’ebé sei hetan impaktu husi projetu alargamentu estrada.
“MOP no SEATOU informa ona mai-ha’u iha fulan kotuk katak sei sobu uma komunidade sira nian iha Suku Bemori, ne’ebé inklui aldeia tolu, hanesan Ailele Hun, Bemori Central no Bemori Centro, ho objetivu atu alarga estrada,” Francisco dehan ba TATOLI, iha Sede Suku Bemori, segunda-feira ne’e.
Nia hatutan katak, to’o agora, MOP seidauk determina ho klaru númeru final uma-kain ne’ebé sei hetan impaktu husi projetu ne’e, maski estimativa inisiál hatudu katak uma-kain 200-resin sei hetan despeju administrativu.
Francisco dehan autoridade lokál aviza ona ba komunidade iha aldeia tolu ne’e atu prepara an molok prosesu despeju administrativu hahú.
“Ha’u aviza ona komunidade sira ne’ebé harii uma besik estrada, liuliu iha Aldeia Ailele Hun, Bemori Central no Bemori Centro, tanba projetu ne’e sei afeta parte karuk no parte loos estrada, ho largura entre metru tolu to’o metru neen,” nia afirma.
Xefe suku ne’e dehan katak komunidade sira prontu atu apoia no kontribui ba dezenvolvimentu nasionál, inklui hodi fó sira-nia rai no uma ba projetu alargamentu estrada, ne’ebé objetivu atu hadi’a asesu ba transporte no hamenus konjestionamentu tráfiku iha área ne’e.
Maski nune’e, nia husu Governu atu garante pagamentu indemnizasaun ba komunidade sira ne’ebé sei lakon uma no rai, molok hahú prosesu demolisaun, atu asegura katak direitu no interese husi família afetada sira hetan protesaun.
Jornalista: Camilio de Sousa
Editór: Filomeno Martins
