CSSI Kovalima distribui foos saka 1.879 ba grupu vulneravel
KOVALIMA, 09 Novembru 2026 (TATOLI) – Sentru Solidariedade Sosiál no Inkluzaun (CSSI) Munisípiu Kovalima distribui ona foos hamutuk saka 1.879 ba família vulnerável sira, liuhusi programa asisténsia umanitária, hodi ajuda responde ba nesesidade ai-han no apoiu família sira ne’ebé enfrenta situasaun difísil.
Diretór CSSI Kovalima, Agapito Asis Cardoso, apoia ona asisténsia ba grupu vulnerável oioin mak família ne’ebé sofre lutu, ema ho defisiénsia, labarik abandonadu, eis prizioneiru, vítima dezastre naturál, estudante ho nesesidade espesífika, igreja no grupu seluk ne’ebé presiza apoia umanitáriu.
Distribuisaun foos ne’e nu’udar implementasaun programa asisténsia umanitária ne’ebé iha objetivu atu responde ba nesesidade família vulnerável sira, liuliu bainhira sira enfrenta situasaun menus ai-han.
“Programa asisténsia umanitária ne’e sai hanesan prioridade CSSI atu bele responde lalais ba nesesidade komunidade vulneravel sira. To’o agora, ita distribui ona foos hamutuk saka 1.879, bazeia ba pedidu ne’ebé simu husi xefe suku sira”, Diretór CSSI ne’e dehan ba TATOLI nia servisu Fatin.
Agapito Asis Cardoso hatutan katak, prosesu identifikasaun benefisiáriu hahú husi autoridade lokál, liuliu administradór postu administrativu no xefe suku sira, ne’ebé iha responsabilidade atu identifika família sira ne’ebé enfrenta difikuldade iha sira-nia suku no postu administrativu.
Hafoin simu pedidu, CSSI halo verifikasaun no observasaun direta iha terenu atu konfirma situasaun família ne’ebé presiza asisténsia. Prosesu ne’e importante atu asegura katak apoiu umanitáriu refere ba benefisiáriu sira ne’ebé duni presiza no evita distribuisaun asisténsia la tuir nesesidade.
Koordenasaun entre CSSI, autoridade postu administrativu no xefe suku importante tebes atu garante prosesu identifikasaun, verifikasaun no distribuisaun asisténsia umanitária la’o ho di’ak, transparente no tuir nesesidade komunidade.
Ho programa ne’e, CSSI Kovalima kontinua fó atensaun ba família vulneravel sira, liuliu sira ne’ebé laiha kapasidade ekonómika sufisiente atu responde mesak ba nesesidade bázika iha moris loroloron nian iha sira nia familia .
Jornalista: Celestina Teles
Editór: Florencio Miranda Ximenes
