Foin sa’e otas nurak, la hakiduk, la’o hasoru
12 Novembru 91
Foin sa’e otas nurak, la hakiduk, la’o hasoru
Hakrobuk husi Motael, ba Santa Cruz,
Hananu knanoik, mananuk berliku,
Hafanun otas nurak, foin sae loriku,
Husi mahowen nia turuk, ami laoliku,
Hakbiit husi kuta, bua malus tabaku.
Loriku otas nurak, beran ida, lao ba oin,
Maske ó Hasobu!
Loriku otas nurak, aten barani, ran mean,
Maske ó Hapara!
Loriku otas nurak, ran nakali, ran manas,
Maske ó Hatenu!
Loriku otas nurak, isin niabutuk, lut hamutuk,
Maske ó Hamout!.
Hakbesik ba besik, pilatus no diablo,
Husi sorin ba sorin, soldadu 303,
Hakat ba oin, botas kilat baioneta,
Hasoru besi meik, hanesan udan rihik.
Foin sa’e otas nurak, la hakiduk, la’o hasoru.
Husi nia tarutu, monu la tarutu,
Hametin ain fatin, tuba nafatin,
Hakanek nabutuk, isin nia butuk,
Husi ran nian fakar, mate nia lekar.
Foin sa’e otas nurak, la hakiduk, la’o hasoru.
Kroat sona borus, hafitar isin lolon,
Kumuliman nafatin, se hirus matan,
Knananuk kokorek, husi manu aman,
Kokorek nafatin, to loro hiit nia aan.
Foin sa’e otas nurak, la hakiduk, la’o hasoru,
BA Santa Cruz, hakrobuk husi Motael,
BA Rai Lulik, Lalatak Lafaek,
BA OAN TIMOR NINIAN,
BA UKUN A’AN RASIK.
Cristovão PEREIRA (Takamatan)/Maut lian
Camea, 21 de Novembru 1991
