HNGV distribui ona kartaun dijitál ba pasiente hamutuk 16.300

DILI, 09 Novembru 2026 (TATOLI)—Diretór Servisu Apoiu Diagnóstiku no Terapêutika (HNGV), Vidal Lopes de Jesus, informa HNGV distribui ona kartaun dijitál konsulta esterna ba pasiente sira hamutuk 16.300 ne’ebé muda ona ba dijitalizasaun.

“Ba oin moras karik bele scan ba mesin no istória moras iha hotu ona ne’eba no médiku sira fó tratamentu,” Vidal Lopes dehan ba jornalista sira iha nia kna’ar fatin iha Hospitál Nasionál Guido Valadares (HNGV), Bidau Tokoh Baru, ohin.

Nia esplika, kartaun ida-ne’e la fahe arbiru maibé fahe ba pasiente sira-ne’ebé mai konsulta ona iha HNGV.  Maibé haree ba pasiente foun mak kontinua fahe, ba moras ne’e atu labele dehan  to’o alvu hira ne’e ninia numeru fixu laiha, moras ne’e lahatene sá tempu no sá loron, banhira  atendimentu iha ne’e pasiente ne’e iha direitu tomak atu hetan kartaun refere.

“Kartaun ne’e vale ba kualker pasiente ne’ebé mak mai halo atendimentu iha ne’e tenke hetan hotu. Maibé kona ba internet depende ba operadór sira, maibé HNGV tenta nafatin parte relevante atu masimiza rede ne’e atu nune’e fasilita ami hodi servisu ho di’ak liután. Daudaun ne’e HNGV halo kontratu ba empreza telkomsel,” nia dehan.

Nia haktuir katak, kartaun ne’e rasik sei vale iha HNGV, tanba HNGV foin mak implementa. Se ba oin MS iha poder atu estende sistema to’o iha munisípiu bele uza  kartaun ne’e, maibé to’o agora munisípiu sira seidauk utiliza, nune’e HNGV de’it mak bele uza uluk sistema ida-ne’e.

“Dijitalizasaun sistema ospitál ne’ebé hahú iha fulan-Jullu no ekipa halo ona nia servisu durante fulan neen ona, nune’e ohin tama ona faze ikus nian. Faze priemeiru mak ita hadia sistema  fahe kartaun dijitalizasaun no medical record ne’ebé la’o ona. Daruak, mak tama ona iha apoiu diagnostiku terapeutiku hanesan laboratóriu, radiolojia, farmásia, banku de sangue, fisioterapia, nutrisaun, sira ne’e tama hotu. Faze datoluk mak  tama  ona iha pasinete sira baixa ne’e signifika  ospitál infomasaun sistema ne’e iha ona, maibé ita mós tenke fó formasaun no kapasita rekursu umanu, nune’e halo operasionalizasaun ba sistema ne’e rasik,” nia dehan.

Nune’e, nia dehan, iha ona faze ikus treinamentu nian ba pesoál saúde sia hotu tantu médiku,  enfermeiru, parteira  sira tenke treinadu hotu hodi utiliza sistema ne’e. Ezemplu, ba oin mak pasiente sira baixa  banhira mediku sira ba haree ne’e la haree ona ba surat tahan maibé uza hotu ona Sistema.

Nia afirma, sistema agora HNGV update la uza ona surat-tahan fazeadamente no ema enter de’it iha sistema liuhusi komputadór ka laptop sei tau iha sala baixa nian, nune’e médiku sira  bele uza ka dijitaliza hotu.

“Ezemplu, pasiente ida mai hasai raiu-x atu baixa, médiku sira la presiza mai foti ona rezultadu ne’ebé mak print out, maibé automatikamente tama iha sistema hodi lee de’it iha ne’eba.

Jornalista : Felicidade Ximenes

Editór        : Cancio Ximenes