HNGV rekoñese enfrenta duni ai-moruk stock out
DILI, 09 Novembru 2026 (TATOLI)–Diretór Servisu Apoiu Diagnóstiku no Terapéutiku Hospital Nasionál Guido Valadares (HNGV), Vidal de Jesus Lopes, rekoñese HNGV enfrenta duni ai-moruk stock out.
“Ami rekoñese katak, HNGV enfrenta duni ai moruk balun stock out. Ita labele dehan ai-moruk iha tanba ida-nee kestaun ema-nia vida ou ema-nia moras ne’e ninia pursentu ha’u seidauk asesu no husu xefe departamentu atu fó informasaun ida-ne’e. Maibé, ita enfrenta duni ai-moruk stock out,” Vidal Lopes hateten ba jornalista sira iha HNGV, ohin.
Vidal de Jesus Lopes hatutan, responsabilidade prinsipál atu asegura prosesu sosa, rai no distribui ai-moruk ba HNGV tama iha kompeténsia Institutu Nasionál Farmásia no Produtu Médiku (INFPM), enkuantu HNGV foka liu ba atendimentu pasiente.
“HNGV halo pedidu ai-moruk ba INFPM regularmente, la’ós de’it liuhusi pedidu eskrita maibé mós uza grupu WhatsApp atu atualiza no fasilita komunikasaun kona-ba nesesidade ai-moruk loro-loron, semana-semana no fulan-fulan. Objetivu komunikasaun ne’e atu asegura katak ai-moruk ne’ebé presiza disponivel iha tempu apropriadu, nune’e ekipa profisionál saúde bele kontinua fó atendimentu ho di’ak, kura pasiente no salva ema-nia vida,” nia esplika.
Nia mós informa katak, HNGV agora iha limitasaun ai-moruk ne’ebé inklui 4.600 item, ne’ebé fahe ba kategoria ai-moruk esensiál, vital no nesesariu.
“HNGV iha alokasaun orsamentu ba kompras emerjénsia, maibé osan ne’e uza de’it ba situasaun emerjénsia, la’ós ba kompras regulár. Ezemplu bainhira ai-moruk ida falta, HNGV bele halo kompras emerjénsia atu asegura fornese ai-moruk ba nesesidade loron ida ka rua, to’o fornese regulár husi instituisaun kompetente bele to’o iha ospitál,” nia relata.
Ministra Saúde, Élia dos Reis Amaral, esplika katak ai-moruk ne’ebé tama iha armazen la permanese kle’ur tanba halo distribuisaun diretamente ba ospitál sira-ne’ebé presiza liuhusi sistema dijitalizasaun.
“Ita hatene katak ita tama ona ba faze dijitalizasaun, ita hatene Stock out la Stock out liu, maibé Stock ne’e nia la permanente iha armajen. Tanba nia kuandu tama iha armajen ne’e nia tenke distribui,” Ministra Saúde Élia dos Reis Amaral, iha Parlamentu Nasionál, ohin.
Jornalista : Felicidade Ximenes
Editór : Cancio Ximenes
