Inaugurasaun eskola foun marka konkluzaun misaun Pacific Partnership 2026 iha Timor-Leste
DÍLI, 09 Novembru 2026 (TATOLI) – Embaixada Estadus Unidus Amérika (EUA), hamutuk ho Governu Timor-Leste, Segunda ne’e (09/11), inaugura edifísiu eskola foun ho sala aula rua iha Eskola Ensinu Báziku Filial (EBF) Mota Ulun, Dili.
Inaugurasaun ne’e marka konkluzaun ba projetu konstrusaun eskola nian no mós konklui misaun Pacific Partnership 2026 iha Timor-Leste.
Serimónia inaugurasaun ne’e hala’o ho koa fita no partisipa husi Enkarregadu Negósius Embaixada EUA, Bruce Begnell; Diretór-Jerál ba Pre-eskolár no Ensinu Báziku, Apolinario Serpa Rosa; Diretór EBF Mota Ulun; no reprezentante Força Defesa Timor-Leste (F-FDTL).
Konstrusaun edifísiu foun ne’e hala’o husi membru Armada Naval Estadus Unidus (U.S. Navy Seabees), liuliu Naval Mobile Construction Battalion Five no Amphibious Construction Battalion One, hamutuk ho enjenheiru F-FDTL.
Ekipa konjunta uza koñesimentu tékniku no abilidade iha área konstrusaun atu harii edifísiu eskola foun, ne’ebé sei aumenta fasilidade no hadi’a ambiente aprendizajen ba estudante sira iha eskola ne’e.
Enkarregadu Negósius Embaixada EUA, Bruce Begnell, dehan katak konstrusaun sala aula foun rua ne’e reflete kompromisu Estadus Unidus atu apoia edukasaun no hametin oportunidade ba labarik sira iha Timor-Leste.
“Liuhusi Pacific Partnership, Estadus Unidus hatudu amizade ne’ebé dura no kompromisu komún ba futuru Timor-Leste. Ami hein katak sala aula ida-ne’e sei sai símbolu permanente ba esperansa, oportunidade no konviksaun komún katak investimentu iha edukasaun mak investimentu ba futuru no prosperidade ne’ebé forte liután,” nia dehan.
Nia akresenta katak, liuhusi projetu konstrusaun ne’e, EUA reafirma kompromisu atu asegura katak labarik hotu-hotu iha Timor-Leste hetan oportunidade atu aprende, dezenvolve sira-nia kapasidade no atinji sira-nia potensiál.
Pacific Partnership mak misaun umanitária no preparasaun ba dezastre multinasionál anuál boot liu iha rejiaun Indo-Pasífiku. Misaun ne’e hahú husi resposta militár Estadus Unidus ba dezastre tsunami iha tasi-Índiku iha tinan 2004.
Iha 2026, misaun ne’e halibur membru forsa armada husi Timor-Leste, Kanada, Alemaña, Nova Zelándia no Estadus Unidus, ho objetivu atu hametin kooperasaun, interoperabilidade entre forsa armada no preparasaun ba resposta ba dezastre.
Tinan ida-ne’e mós marka realizasaun misaun Pacific Partnership dala ualu iha Timor-Leste.
Durante misaun ne’e, Estadus Unidus lori pesoál médiku na’in-50 resin ba Timor-Leste, ne’ebé fó asisténsia médika no formasaun ba sidadaun timoroan liu na’in-1.200. Aleinde servisu médiku, ekipa misaun nian mós hala’o formasaun oioin kona-ba resposta ba dezastre no reabilita edifísiu eskola ida iha EBF Kasnafar, Dili.
Ho inaugurasaun edifísiu foun iha EBF Mota Ulun, misaun Pacific Partnership 2026 aumenta kontribuisaun ba setór edukasaun no hametin tan relasaun kooperasaun entre Estadus Unidus no Timor-Leste.
Jornalista: Camilio de Sousa
Editór: Filomeno Martins
