Komisaun rekurtamentu seidauk simu karta ofisiál ba alegasaun pergunta “bocor”
DILI, 09 Novembru 2026 (TATOLI)—Prezidente Juri ba Komisaun Rekrutamentu no atuál Diretor Servisu Apoiu Diagnóstiku no Terapeutika iha HNGV, Vidal de Jesus Lopes, hateten relasiona ho kandidatu aplikante ba vaga kareira espesilizada iha Hospital Nasionál Guido Valadares katak aplikante balun hetan matéria ba teste eskrita “bocor” mak to’o agora seidauk simu karta ofisiál ruma ba alegasaun pergunta ba teste “bocor”.
“Kona-ba preokupasaun husi kandidatu sira-ne’ebé tuir vaga espesiliadade liuliu ba iha médiku jerál nian, tuir vaga ne’ebé mak Hospitál Nasionál Guido Valadares loke ne’e, ema hotu-hotu akompaña, vaga ne’ebé maka ospitál presiza tuir loloos ne’e 478. Iha faze rekrutamentu, iha faze tolu mak faze primeiru selesaun dokumentu, segundu teste eskrita eletrónika no terseiru mak entrevista. Entaun, ami seidauk hetan karta reklamasaun ofisiál ruma dirije mai ekipa de juri, maibé ita akompaña média katak iha referénsia ne’e mós ita haree iha whatsapp grupu sira screenshut fahe iha duni rezumu iha ne’ebá, maibé karta ruma seidauk mai,” Vidal Lopes dehan iha nia kna’ar fatin HNGV, ohin.
Iha primeira faze, ema mai aplika ne’e hamutuk 8.084 no depois selesaun dokumentu mak elemina tiha 6.448, no hafoin ne’e mak tama iha faze teste eskrita eletrónika husi númeru referénsia ne’ebé mak fó sai hahú husi númeru 01 to’o 22 ne’e ninia pergunta la hanesan.
Tuir nia, kada área ida-idak pergunta la hanesan tanba médiku jerál pergunta ketak, enfermeiru pergunta ketak, parteira ketak, tékniku aliadu ketak, radilojia ketak, Banku de Sangue, Farmasia, Nutrisaun, tékniku ba Biomedikal niaprgunta ketak, ba medikal rekor nia ketak no ba iha otomolojia nian ketak.
Buat ne’eb’e sosiedade kestiona ona ne’e mak médiku jerál ne’e, tanba espalla iha mídia sosiál ka mídia ne’ebé mak fó sai informasaun iha indisiu dehan matéria ne’e “bocor”. Einprisipu kualker kandidatu ida iha direitu tomak atu halo rezumu, atu foti husi livru referénsia oioin ne’e nia direitu, entaun ekipa juri seidauk hetan karta reklamasaun ofisiál ruma mak dirije mai.
Nia esplika, karik kandidatu ne’e foti husi referénsia sira-ne’e relasiona ho área espesiliazada ba teste ne’e rasik, ne’e sira-nia direitu maibé labele dehan sira labele aprende no labele estuda ida-ne’e.
“Ami halo enkontru no halo investigasaun interna katak ekipa de juri ka komisaun rekurtamentu la hasai matéria teste elektróniku ba kualker kandidatu ka aplikante sira, tanba ne’e komisaun rekurtamentu no komisaun juri reseita informasaun ne’e,” nia esplika.
Nia haktuir, teste eskrita eletrónika ne’e ema ida-idak haree nia valór ne’e sistema iha, laiha ema ida mak interven iha ne’ebá, maibé sistema iha funsaun públika mak determina ne’ebé faze rua ne’e liu hotu ona.
“Publikasaun iha tiha ona ida liu ne’e mak 2.072 husi 8.084 ita liu iha faze rua redús ona ba 2.072. Signifika iha faze rua ne’e ita elemina ona 6.0006 no husi númeru ne’e iha aplikante ida ka rua kestiona, ne’e normál. Ne’e hola parte hotu iha prosesu tanba la fasil ita redús 8.000 ba 2.000, ne’e ida-rua sempre la satifás ho rezultadu ida-ne’e. Ne’ebé, ida-ne’e fáz parte husi prosesu. Ami konsiente hela depois liu ona iha faze rua hela 2.072 ne’e, ami tenke elemina tan 1.700 hanesan ne’e, ne’ebé kada faze ne’e sempre iha dezafiu,” nia afirma.
Komisaun rekurtamentu sei fó tan tempu ba aplikante sira atu halo reklamasaun ba faze teste eletrónika no komisaun rekurtamentu nafatin fó sira halo reklamasaun hahú loke Segunda to’o Sesta semana ne’e.
“Depois kon- ba entervista depois ami ekipa juri sei halo enkontru ida atu deside kada loron ne’e ita entrevista ema na’in hira no sei deside nia mekanizmu ho oráriu atu nune’e ema labele mai dala ida mak ita bolu ida-idak, lae. Ita sei haree nia mekanizmu atu nune’e ida-idak mai tuir nia loron no oras,” nia dehan.
Jornalista : Felicidade Ximenes
Editór : Cancio Ximenes
