Konstrusaun sentru juveníl iha faze koordenasaun interministeriál
DILI, 09 Novembru 2026 (TATOLI)–Ministru Justisa, Sergio da Costa Hornai, informa, ekipa téknika husi Ministériu Justisa (MJ) no Konsellu Administrsaun Fundu Infraestrutura (KAFI) halo hela diskusaun hodi bele realiza dezeñu ba Sentru Juvenil ne’e.
“Hein tanba projetu ne’e KAFI ninian, koordenasaun Ministériu Justisa ho Ministériu Planeamentu no Investimentu Estrátéjiku (MPIE) atu konklui buat balun. Koordenasaun ita la’o hela, buat balun mós ami esforsu atu bele konklui,” Ministru Justisa hato’o ba jornalista sira bainhira partisipa iha diskusaun Orsamentu Jerál Estadu (OJE) 2027 iha faze jeneralidade, iha Parlamentu Nasionál, Segunda ne’e.
Nia konsiente, konstrusaun sentru juveníl la’o tarde tanba hetan impedimentu husi servisu tékniku balun. MJ submete ona proposta ba MPIE.
“Problema tanba ita haree servisu tékniku balun ne’ebé mak tenke halo. Ita-boot sira hatene dezeñu mós sei lori tempu oituan, entaun iha ne’e prosesu aprovizionamentu balun ne’ebé la’o hela. Maibé o que serto ita kontinua iha vontade polítiku para kontinua,” nia akresenta.
Notísia relevante : MJ no CNA hahú forma juri ba dezeñu Sentru Juveníl
Governate ne’e dehan, projetu sentru juveníl ne’e nu’udar projetu pluri anuál ne’ebé bele akontese iha kualker momentu.
“Ita-nia projesaun se hakarak konklui iha tinan 2028 bele konklui ba sentru juveníl ne’ebé bele providénsia ba ita-nia joven oan sira ne’ebé iha problema kona-ba justisa,” nia subliña.
Jornalista : Natalino Costa
Editora : Julia Chatarina
