Kriasaun empregu vitál tebes ba dezenvolvimentu iha TL
DILI, 09 Novembru 2026 (TATOLI)—Primeiru-Ministru, Kay Rala Xanana Gusmão, hateten kriasaun empregu vitál tebes ba prosesu dezenvolvimentu iha Timor-Leste, tanba iha ema ida de’it entre na’in-tolu ho tinan 15-resin mak iha empregu no jovens na’in-tolu entre sanulu ho tinan 15 to’o 24 mak la eskola, la iha servisu no la iha formasaun profisionál.
“Ita labele simu atu ita-nia rikusoin boot-liu ba ita-nia povu liuliu joven sira, ita ladun aproveita. Maibé administrasaun públika labele emprega ema hotu-hotu. Ita presiza esplorasaun agríkola, atividade peska, ofisinál ho empreza privada ne’ebé bele hasa’e, kria empregu no kontribui ba reseita nasionál,” PM Xanana subliña iha debate jeneralidade ba OJE 2027 iha Parlamentu Nasionál, ohin.
Tanba ne’e, Xefe Governu husu joven sira tenke iha seriedade ba edukasaun ho formasaun tanba nasaun ne’e presiza imi-nia kapasidade ho imi-nia ideia. Entaun, dever Governu nian mak atu kria kondisaun atu imi-nia esforsu bele transforma iha oportunidades reál.
Edukasaun ho formasaun profisionál tenke fó ba joven sira kompeténsi úteis ba empregu no ba empreendedorizmu, tanba sidadaun Timor-Leste ne’ebé servisu iha estranjeiru mós fó kontributu ne’ebé aumenta tan sira-nia remesa atinje millaun $104,5 iha semestre dahuluk 2026, kompara ho millaun $80,4 iha períodu ne’ebé hanesan iha 2025.
Rendimentu ne’e tulun família sira satisfás nesesidade esensiál no bele apoia investimentu iha pekeñas empreza,” nia hateten.
Entaun Governu rekoñese esforsu ho sakrifísiu boot hodi hetan kontribuisaun hirak-ne’e. Empregu iha estranjeiru oferese oportunidade importante, maibé labele substitui kriasaun traballu dignu iha ita-nia país rasik.
“Ita hakarak traballadór sira-ne’ebé fila, bele investe iha-ne’e ho sira-nia esperiénsia ho sira-nia poupansa, no atu joven timoroan sira bele hili dalan ne’ebé de’it hodi bele harii sira-nia future,” nia dehan.
Jornalista : Alexandra da Costa
Editór : Cancio Ximenes
