Sai membru ASEAN, TL tenke aprende husi nasaun viziñu atu atrai investidór sira
DILI, 09 Novembru 2026 (TATOLI)—Primeiru-Ministru, Kay Rala Xanana Gusmão, hateten hanesan membru foun iha Asosiasaun Nasaun Sudeste Aziátiku (ASEAN), Timor-Leste iha oportunidade foun atu komersializa no tenke aprende ho esperiénsia husi nasaun viziñu sira atu atrai investidór sira hodi investimentu iha rai ida-ne’e.
Nia hateten, Timor-Leste mós reforsa daudaun ninia partisipasaun iha ekonomia rejionál no internasionál, tanba iha 2024 ne’e Timor-Leste adere ba Organizasaun Mundial Komérsiu (OMK) no sai hanesan mós membru ASEAN ba da-11.
“Maibé adezaun ne’e de’it, sei la halo ita-nia empreza sira sai kompetitiva, empreza sira presiza infraestrutura viável, traballadór kualifikadu, regra klara no produtu ne’ebé bele responde ba ezijénsia husi kliente sira,” Primeiru-Ministru, Xanana Gusmão, hateten liuhusi diskursu ba abertura debate Orsamentu Jerál Estadu (OJE) 2027 iha faze jeneralidade iha Parlamentu Nasionál, ohin.
Xefe Governu hateten, Timor-Leste nia traballu iha área aduaneira, administrasaun públika ho reforma ekonómika tenke serve didi’ak atu sira bele aproveita oportunidade hirak-ne’e, tanba iha 2027 ne’e TL sei simu reuniaun altu nível ASEAN ho CPLP nian.
Nune’e nia hateten responsabilidade hirak-ne’e hanesan oportunidade atu hametin parseria ne’ebé apoia dezenvolvimentu nasionál, nune’e tenke simu ho profisionalizmu no ho jestaun rigoroza ba nia kustu.
“Iha 2027, sei hahú preparativu, ein-termu lojístiku no infraestrutura ba Prezidénsia Timor-Leste iha ASEAN, iha 2029,” nia dehan.
Jornalista : Alexandra da Costa
Editór : Cancio Ximenes
