Uma-kain 152 iha Aldeia Has Laran seidauk asesu bee-moos
DÍLI, 09 Novembru 2026 (TATOLI) – Uma-kain hamutuk 152 iha Aldeia Has Laran, Suku Bemori, Postu Administrativu Nain Feto, Munisípiu DÍli, seidauk iha asesu ba bee-moos, no komunidade kontinua enfrenta difikuldade atu hetan bee ba nesesidade loroloron.
Xefe Suku Bemori, Francisco Sequiera, hateten katak suku ne’e iha aldeia hamutuk hitu, inklui Ailele Hun, Baba Liurai Leste, Baba Liurai Oeste, Bemori Central, Bemori Centro, Has Laran no My Friend. Husi aldeia hitu ne’e, Has Laran mak aldeia úniku ne’ebé seidauk asesu ba sistema distribuisaun bee-moos.
“Falta bee-moos sai preokupasaun boot ba komunidade, liuliu ba uma-kain na’in 152 iha Aldeia Has Laran,” Francisco hateten ba TATOLI iha nia knaar-fatin, Suku Bemori, Dili, iha segunda-feira.
Francisco dehan nia aprezenta ona pedidu ba Bee Timor-Leste (BTL, EP) atu instala sistema bee-moos ba komunidade, maibé to’o agora seidauk simu resposta.
Nia esplika katak, maski seidauk hetan asesu ba servisu bee-moos husi BTL, komunidade kontinua buka dalan atu asegura bee ba nesesidade loroloron.
Francisco husu Governu, liuhusi BTL, EP, atu instala sistema distribuisaun bee-moos iha Aldeia Has Laran, atu komunidade bele hetan asesu ba bee ho fasilidade.
“Ho situasaun ne’e, ami hein katak Governu, liuhusi BTL, EP, bele instala sistema distribuisaun bee-moos ba komunidade iha Aldeia Has Laran. Ami prontu atu selu bee bainhira BTL, EP instala ona sistema distribuisaun bee ba ami,” nia afirma.
Jornalista: Camilio de Sousa
Editór: Filomeno Martins
