Xanana konsidera kooperativa asume papel importante iha ekonomia TL
DILI, 09 Novembru 2026 (TATOLI)—Primeiru-Ministru, Kay Rala Xanana Gusmão, konsidera kooperativa asume papel importante ba ekonomia iha Timor-Leste, tanba ho númeru membru aumenta, ne’ebé envolve barak tan produtór sira.
“Ho jestaun di’ak sira bele ajuda sira-nia asosiadu sira hetan fatór produsaun, hadi’a kualidade no negosia di’ak-liu asesu ba merkadu,” Xefe Governu afirma iha Parlamentu Nasionál, ohin.
PM Xanana deklara, objetivu vizaun emprezariál ida-ne’e, nia finalidade mak atu insentiva, uitoan-uitoan, produtividade ne’ebé di’ak-liu ba transformasaun graduál iha produtu sira-ne’ebé bele redús produtu importasaun ne’ebé ita konsome iha Timor-Leste, no ida-ne’e sei kria empregu no tulun populasaun hadi’a sira-nia kondisoens moris.
“Maske asesu ba finansiamentu kontinua, maibé sei hanesan obstákulu boot ida. Saldu empréstimus husi bankus komersiais ba agrikultura besik millaun $1,5 de’it, no ba indústria transformadora besik millaun $6,5. Númeru hirak-ne’e hatudu oinsá empreza produtiva sira kontinua iha difikuldade atu hetan kapitál,” nia dehan.
Governu kria Banku Nasionál Dezenvolvimentu ho misaun atu apoia investimentu viável iha setór prioritáriu ho desizoens kona-ba kréditu ne’ebé sólida no boa jestaun rekursu públiku.
“Kréditu ne’e tenke serve hodi insentiva ema sira atu hahú sira-nia atividade iha empreza ne’ebé sustentável liu, atu nune’e bele garante partisipasaun boot liu husi komunidades,” nia dehan.
Enkuantu, daudaun ne’e totál grupu kooperativa ne’ebé rejistadu iha Sekretária Estadu Kooperativa hamutuk 230-resin.
Jornalista : Alexandra da Costa
Editór : Cancio Ximenes
