Abitante Ainauai husu Uca-Aba aselera obra eletrifikasaun ne’ebé parada hela

VIKEKE, 10 Novembru 2026 (TATOLI)—Xefe Aldeia Ainauai, Ciquito Pinto, hamutuk ho komunidade, husu empreza Uca-Aba Unipessoal, Lda. atu aselera obra eletrifikasaun iha Aldeia Ainauai, Suku Uma-Ki’ik, Postu Administrativu Vikeke Vila, Munisípiu Vikeke, ne’ebé parada hela, atu komunidade bele asesu ba enerjia eletrisidade.

Ciquito Pinto haktuir katak, to’o agora empreza ne’ebé responsabiliza ba projetu ne’e seidauk kontinua servisu, maski instalasaun ai-riin eletrisidade sira hotu ona. Tanba ne’e, nia husu atu empreza aselera obra ne’e hodi komunidade bele asesu ba eletrisidade.

“Uluk, empreza hatuur ona ai-riin eletrisidade hotu, depoiz atu kontinua dada fiu eletrisidade, maibé agora empreza la halo servisu. Iha fulan Outubru kotuk, loron 9, ekipa EDTL nasionál mai, no empreza mós mai kontinua servisu. Maibé, hafoin ekipa nasionál sira fila, empreza mós fila ona no agora abandona servisu ne’e,” Ciquito Pinto dehan ba TATOLI, I.P., iha Postu Administrativu Vikeke Vila, Tersa ne’e.

Nia dehan katak autoridade aldeia no komunidade Ainauai relata ona problema obra eletrifikasaun ne’e ba Provedoria Direitu Umanu no Justisa (PDHJ-sigla portugeza), atu instituisaun ne’e bele hato’o ba entidade relevante sira hodi tau-atensaun ba situasaun ne’e.

“Tanba agora ema la halo servisu iha obra ne’e. Ami husu empreza Uca-Aba Unipessoal, Lda. atu aselera servisu, hodi tama fulan-Dezembru populasaun bele asesu ona eletrisidade, tanba ami kuaze tinan barak ona la asesu ba naroman,” nia hato’o.

Ciquito Pinto relata tan katak obra eletrifikasaun iha Suku Uma-Ki’ik agora falta de’it servisu dada fiu eletrisidade, maibé empreza seidauk konsege finaliza servisu ne’e.

Iha fatin ketak, Xefe Suku Uma-Ki’ik, Cláudio Amaral, hateten katak autoridade suku mós ko’alia ona ho diretór empreza Uca-Aba atu aselera obra ne’e, hodi komunidade bele asesu ba eletrisidade.

“Kona-ba obra eletrifikasaun iha Suku Uma-Ki’ik, ha’u husu ona ba diretór kompañia atu aselera servisu, antes udan-been monu-rai. Agora empreza sei hein fiu eletrisidade ne’ebé seidauk to’o Vikeke. Bainhira fiu sira to’o ona, ha’u sente katak empreza sei aselera fali servisu,” nia haktuir.

Relasiona ho preokupasaun ne’e, jornalista TATOLI, I.P. iha Munisípiu Vikeke koko atu kontaktu empreza ne’ebé responsabiliza ba projetu ne’e, maibé la konsege asesu númeru telefone empreza nian.

Obra eletrifikasaun iha Suku Uma-Ki’ik ne’e sei fó benefísiu ba família hamutuk 193 iha aldeia haat, mak Raihun, Macadean, Maroman no Ainauai.

Projetu ne’e iha númeru kontratu 004/WK/EDTL, E.P. 2025, ho montante orsamentu US$247.903,60, no empreza Uca-Aba Unipessoal, Lda. mak responsabiliza atu ezekuta obra ne’e.

Kontestu

Projetu eletrifikasaun iha Suku Uma-Ki’ik hahú implementa iha Fevereiru 2025, ho objetivu atu fó asesu ba eletrisidade ba uma-kain 193 iha aldeia haat, mak Raihun, Macadean, Maroman no Ainauai. Projetu ne’e iha númeru kontratu 004/WK/EDTL, E.P. 2025, ho valór US$247.903,60, ne’ebé empreza Uca-Aba Unipessoal, Lda. mak responsabiliza atu ezekuta.

Iha notísia TATOLI ne’ebé publika iha Setembru 2025, EDTL informa katak obra ne’e para durante fulan lima, ho progresu 23% de’it. Maski iha tinan 2026 obra ne’e hahú filafali, iha Setembru 2026 autoridade Aldeia Ainauai relata katak empreza abandona fali servisu durante fulan rua-resin. To’o agora, komunidade kontinua hein atu obra ne’e ramata hodi bele asesu ba eletrisidade.

Klik notísia relevante sira iha kraik hodi lee:

1. Projetu eletrifikasaun ba Suku Uma-Ki’ik, Vikeke Vila, hahú implementa — Notísia kona-ba hahú implementasaun projetu eletrifikasaun iha Fevereiru 2025.
2. Projetu eletrifikasaun iha Suku Uma-Ki’ik hatudu progresu — Notísia kona-ba progresu obra no instalasaun ai-riin eletrisidade iha Jullu 2025.
3.  EDTL, E.P. klarifika empreza Uka-Aba abandona obra eletrifikasaun iha Uma-Ki’ik — Klarifikasaun EDTL kona-ba obra ne’ebé para durante fulan lima no progresu ne’ebé atinje 23%.
4. Empreza abandona filafali obra eletrifikasaun iha Suku Uma-Ki’ik — Notísia Setembru 2026 kona-ba abandonu filafali obra no preokupasaun autoridade Aldeia Ainauai.

Jornalista: Vitorino Lopes da Costa

Editór: Xisto Freitas da Piedade