Komité 12 Novembru husu ME atu integra istória Masakre Santa Krúz iha kurríkulu nasionál
DILI, 10 Novembru 2026 (TATOLI)—Prezidente Komisaun Organizadora Loron Nasionál 12 Novembru, Denilson Guterres, husu Ministériu Edukasaun (ME) atu integra matéria kona-ba istória manifestasaun no Masakre Santa Krúz, ne’ebé akontese iha 12 Novembru 1991, iha kurríkulu nasionál, atu fó oportunidade ba estudante sira komprende kle’an liután istória luta libertasaun Timor-Leste.
“Komité konsidera katak manifestasaun 12 Novembru 1991 sai nu’udár pontu importante iha partisipasaun juventude Timor-Leste nian ba luta libertasaun nasionál, liuliu iha Sidade Dili,” Denilson dehan iha Sede OJETIL, Segunda (09/11/2026).
Tanba ne’e, Komité husu Ministériu Edukasaun atu haree no konsidera matéria istórika kona-ba manifestasaun no Masakre Santa Krúz, atu sai parte integrál husi kurríkulu nasionál.
Komité mós hato’o agradese ba parte hotu ne’ebé kontribui ba prezervasaun istória no luta juventude Timor-Leste nian. Komité hein katak, liuhusi integrasaun matéria ne’e iha kurríkulu, estudante sira iha siklu sekundáriu bele aprende no komprende di’ak liután luta no sakrifísiu ne’ebé juventude no povu Timor-Leste halo atu hetan independénsia.
Iha parte seluk, Ministra Edukasaun, Dulce de Jesus Soares, hateten katak Ministériu Edukasaun hatama ona istória Masakre Santa Krúz iha kurríkulu.
“Kona-ba istória ka matéria Masakre 12 Novembru, agora tama ona iha kurríkulu Ministériu Edukasaun nian, nune’e estudante sira bele hatene kle’an liután istória Masakre Santa Krúz no valoriza sakrifísiu ne’ebé halo atu hetan independénsia nasionál,” ministra ne’e dehan.
Iha oportunidade ne’e, Ministra Dulce subliña katak manorin sira tenke kontinua eduka no orienta estudante sira kona-ba istória Timor-Leste nian.
Governu Timor-Leste, liuhusi Ministériu Edukasaun, iha planu atu integra istória Masakre Santa Krúz, ne’ebé akontese iha 12 Novembru 1991, iha kurríkulu nasionál ba ensinu báziku no ensinu sekundáriu, hodi asegura katak jerasaun foun sira komprende didi’ak istória luta no orijen independénsia nasaun nian.
Kontestu
Masakre Santa Krúz ne’ebé akontese iha 12 Novembru 1991, sai nu’udár akontesimentu istóriku importante iha prosesu luta libertasaun Timor-Leste. Iha loron ne’e, juventude Timor-Leste hamutuk ho manifestante sira halo manifestasaun pasífika husi Igreja Motael bá Semitériu Santa Krúz, iha Dili.
Akontesimentu ne’e rezulta iha vítima mate no kanek barak, no sai pontu importante ida-ne’ebé lori atensaun komunidade internasionál ba luta povu Timor-Leste nian.
Iha tinan 2026, Ministériu Edukasaun hamutuk ho Komisaun Organizadora Jerasaun Foun 12 Novembru (K12N) realiza mós sertame nasionál ba estudante sira, ho objetivu atu haforsa koñesimentu no komprensaun jerasaun foun kona-ba istória Masakre Santa Krúz no luta rezisténsia povu Timor-Leste nian.
Klik notísia relevante sira iha kraik hodi lee:
- 1. Lee notísia kompleta iha TATOLI. K12N no ME realiza sertame nasionál haforsa koñesimentu estudante sira kona-ba Masakre Santa Krúz (09 Novembru 2026).
- 2. Lee notísia kompleta iha TATOLI. “Ho Espíritu Juventude 12 Novembru nian, Lori ita Hamutuk ba Harii Pás” (05 Novembru 2026).
- 3. Lee notísia kompleta iha TATOLI. Konsulta masál relembra sakrifísiu juventude Loriku As’uain 12 Novembru (06 Novembru 2026).
Jornalista: Osória Marques
Editór: Xisto Freitas da Piedade
