ME hato’o tristeza ba kazu sona profesora iha Atabae, hein rezultadu investigasaun
DILI, 10 Novembru 2026 (TATOLI)—Ministra Edukasaun, Dulce de Jesus Soares, hato’o tristeza kona-ba kazu violénsia ne’ebé envolve manorin ida, Martinha Leu Mali, ne’ebé hetan sona husi ema deskoñesidu iha madrugada, kuaze tuku 03:00, iha Eskola Bázika Filiál (EBF) Aidabaslala, Suku Hataz, Postu Administrativu Atabae, Munisípiu Bobonaru, iha 06 Novembru 2026.
Ministra Dulce de Jesus Soares afirma katak Governu liuhusi Ministériu Edukasaun, halo esforsu boot atu rekruta manorin sira bazeia ba sistema méritu no kualifikasaun, inklui aloka manorin sira hosi munisípiu ida bá munisípiu seluk, hodi garante asesu ba edukasaun iha territóriu tomak.
“Ha’u sente triste tebes bainhira haree akontesimentu ne’e, tanba Governu no ministériu idaidak tau esforsu boot atu rekuta manorin tuir méritu no valór ne’ebé sira iha. Maibé, akontesimentu hanesan ne’e akontese iha Atabae, ha’u sente triste,” Ministra Edukasaun, Dulce de Jesus Soares, dehan ba jornalista sira iha Eskola Ensinu Báziku 12 Outubru Tasi-Tolu, Komoro, Tersa ne’e.
Nia esplika katak, bazeia ba informasaun ne’ebé nia simu hosi superintendente edukasaun, antes akontesimentu ne’e, vítima planeia atu muda hela-fatin hosi eskola ne’ebé nia hela bá eskola sekundária ne’ebé besik liu ba nia uma.
Maibé, komunidade lokál husu ba manorin ne’e atu kontinua hela iha fatin ne’ebá, no autoridade sira asegura katak sei fó protesaun no garante nia seguransa.
Ministra mós hateten katak vítima la’ós manorin mesak ne’ebé hela iha área rezidénsia eskola nian, maibé iha mós manorin seluk no profisionál médiku ida-ne’ebé hela iha área hanesan.
Dulce de Jesus Soares informa katak Polísia kaptura ona suspeitu ida-ne’ebé alegadamente envolve iha kazu ne’e, no prosesu investigasaun kontinua hela.
Nia husu ba parte hotu atu respeita lei no husik prosesu investigasaun la’o tuir prosedimentu legál ne’ebé vigora iha Timor-Leste.
Antes ne’e, manorin Martinha Leu Mali hetan sona iha kotuk-laran husi ema deskoñesidu, iha madrugada kuaze tuku 03:00, iha EBF Aidabaslala. To’o agora, kauza ka motivu ba akontesimentu ne’e seidauk klaru.
“Ita hein de’it rezultadu hosi prosesu investigasaun,” Ministra Dulce esplika.
Kontestu
Kazu sona manorin Martinha Leu Mali akontese iha madrugada 06 Novembru 2026, kuaze tuku 03:00, iha nia rezidénsia besik Eskola Bázika Filial Aidabaslala, Aldeia Aidabaslala, Suku Hataz, Postu Administrativu Atabae, Munisípiu Bobonaru.
Bazeia ba informasaun ne’ebé PNTL Munisípiu Bobonaru fó-sai, polísia konsege kaptura suspeitu ida iha área Lourba, hafoin halo buka no perseguisaun. Suspeitu ne’e entrega ba Polísia Eskuadra Atabae atu kontinua prosesu investigasaun no identifikasaun.
Akontesimentu ne’e hamosu preokupasaun kona-ba seguransa manorin sira, liuliu sira-ne’ebé servisu iha área remota no hela dook hosi família. Ministériu Edukasaun mós halo apelu ba komunidade atu koopera no fó apoiu ba manorin sira, hodi asegura katak sira bele hala’o kna’ar hanorin iha ambiente seguru.
Klik notísia relevante iha kraik hodi lee:
- Lee notísia kompleta iha TATOLI. Kazu sona profesora iha Atabae, PNTL kaptura ona suspeitu iha Lourba – TATOLI, 06 Novembru 2026.
Jornalista: Osória Marques
Editór: Xisto Freitas da Piedade
