Vikeke sei hasoru Aileu iha semi finál kopa Juvenil U-17 2026

DILI, 10 Novembru 2026 (TATOLI)—Kopa Juvenil U-17 2026 ne’ebé finansia direta husi Federasaun Futeból Timor-Leste (FFTL), daudaun ne’e tama ona ba faze semi finál, ne’ebé sei hala’o iha Tersa (10/11) kalan, iha Kampu FFTL, Bairru dos Grilhos, Dili.

Iha jogu semi finál dahuluk, ekipa U-17 Munisípiu Vikeke sei hasoru ekipa U-17 Munisípiu Aileu no ekipa husi Vikeke sente otimizmu atu manán hogu referida.

Treinadór ekipa U-17 Munisípiu Vikeke, Justino Baptista Brandão, hateten jogu ida-ne’e hanesan jogu kontinuasaun husi jogu rejionál ne’ebé hala’o iha Baukau.

“Jogu ida-ne’e hanesan jogu kontinuasaun husi jogu rejionál ne’ebé hala’o iha Baukau, ami Vikeke hetan tikete hodi tama ba jogu semi finál ne’ebé sei kontra ekipa U-17 husi Aileu, ami optimista katak sei manán,” Justino hateten ba jornalista sira iha edifísiu FFTL, Dili, Tersa ne’e.

Nia afirma, ninia ekipa preparadu ona atu hasoru ekipa futeból Aileu tanba ninia jogad’or sira preparadu atu manán.

“Ami preparadu, minutu 90 iha kampu laran mak sei termina. Ha’u tau konfiansa tomak ba jogadór sira, ami sei manán jogu ne’e. Aileu joga di’ak, maibé ami sei hala’o jogu di’ak kontra sira hodi hetan vitória hakat ba finál,” nia dehan.

Kona-ba eskoru, Justino lakohi mensiona númeru tanba atu manán ho golu hira, maibé nia fiar kan ninia ekipa sei manán jogu ne’e.

Nia mós hateten, jogu ne’e importante atu promove jogadór sira-nia talent, tanba ne’e ninia ekipa sei hatudu jogu di’ak atu nune’e promove jogadór sira-nia talentu, no sira bele hetan oportunidade tama iha selesaun nasionál hodi ba joga iha rai-li’ur.

Iha fatin hanesan, Treinadór ekipa U-17 Munisípiu Aileu, Hercio Araujo Carlos, hateten Aileu preparadu tebes hodi hala’o jogu ne’e.

“Aileu preparadu tebes hodi hala’o jogu ne’e. Ami hatene Vikeke preparadu, maibé ami mós halo preparasaun másimu mak tama to’o semi finál ne’e,” Hercio hateten.

Nia hatutan, rezultadu jogu sei determina iha kampu laran, tanba iha minutu 90 nia laran ne’e buat balun sei akontese no lakon ka manán durante jogu nia laran mak sei determina,” nia dehan.

RAEOA kontra Dili Oeste

Aleinde jogu Vikeke kontra Aileu, Kopa Juvenil U-17 2026 sei iha tan jogu semi finál daruak, ekipa U-17 RAEOA sei hasoru ekipa U-17 Dili Oeste, no jogu ne’e sei hala’o mós iha Tersa (10/11) lorokraik, iha Kampu FFTL, Bairru dos Grilhos, Dili.

Treinadór ekipa U-17 RAEOA, Simão Enfein, hateten RAEOA mai Dili la’ós atu pasear maibé atu kompete no manán.

“Oekusi mai atu kompete no ami fiar ami sei manán, Dili joga di’ak, maibé ami hakarak manán sira,” Simão hateten ba jornalista sira iha edifísiu FFTL, Dili, Tersa ne’e.

Nia esplika, dalan ba semi finál la’ós fasil maibé liuhusi prosesu oioin, tanba ohin sira mai duni Dili hodi kompete iha semi finál.

Iha fatin hanesan, Treinadór ekipa U-17 Dili Oeste, Fabrisio Fereira, hateten nia ekipa iha materia jogu ne’ebé di’ak no optimista sei manán.

“Ami iha materia jogu ne’ebé di’ak, ami mós optimista katak sei manán sira, maibé ne’e hanoin de’it, iha jogu laran minutu 90 mak sei termina,” Fabrisio hateten.

Nia fó konfiansa tomak ba nia jogadór sira tanba sira mak sei halo servisu iha kampu laran, maibé sira sei simu orientasaun husi treinadór no nia fiar sei hatudu jogu di’ak.

Jornalista : Hortêncio Sanchez

Editór        : Cancio Ximenes