Ekipa AIFAESA halo ona inspesaun ba loja SEARA iha Ermera

DILI, 10 Novembru 2026 (TATOLI)—Diretora Operasionál AIFAESA, Idonia Sanches, hateten naan ayam potong ne’ebé mak lanu labarik sira iha Glenu ne’e, ekipa AIFAESA tun halo ona inspesaun ba loja SEARA iha Munisípiu Ermera.

“Kona-ba naan ayam potong ne’ebé mak lanu labarik ida iha Ermera, iha informsaun ami simu ona no ekipa AIFAESA tun ona ba terrenu. Maibé momentu lanu ne’e pasiente ne’e baixa kedas   no médiku sira halo kedas atendimentu. Tuir informasaun katak iha família ida mak konsumu naan ayam potong no iha ne’eba labarik idade tinan lima no tinan ida ne’e mak mosu kedas muta no lori halai ba ospitál halo kedas tratamentu,” Idonia Sanhes hateten ba TATOLI, iha nia kna’ar fatin Matadoru, ohin.

Nia afirma, antes ne’e AIFAESA taka ona estalesimentu SEARA iha Pantai Kelapa maibé la’ós empreza SEARA, entaun Timor-Leste ne’e maiória loja SEARA barak.

“Iha regulamentu hateten katak iha empeza ne’ebé mak komete infrasaun tinan ida dala tolu, AIFAESA ba taka permanente maibé tenke liuhusi prosesu ne’ebé mak naruk. Kona-ba sansaun  banhira nia infrasaun ruma ne’e konsekuénsia sempre iha. Entaun, SEARA iha Ermera ne’e ekipa sira observa  fatin  di’ak hotu, maibé iha produtu ne’ebé mak nia konserva ne’e mak balun estragu no balun data validade la moos ona. Depois balun tan mak falta rekezitu sira, entaun agora daudaun sei asegura hela ida-ne’e nia prosesu kontinuasaun mak ita sei halo  auto  de notisia no ikus liu mak hetan sansaun ba situasaun ida-ne’e,” nia afirma.

Nia esplika, agora daudaun foin iha Munisípiu Ermera dahuluk, entaun fó tolera nia atu hadi’a nia kondisaun konservasaun ba produtu sira.

“Iha inspesaun ne’e hetan mak ikan, naan ayam potong, naget no liis mean ida-ne’e mak ekipa hasai hotu,” nia relata.

Husi Janeiru to’o novembru AIFAESA halo ona inspesaun ba atvidade ekonómika iha munisípiu hotu inklui Dili hamutuk 7.116 no 501 mak halo ona komete infrasaun.

Jornalista : Felicidade Ximenes

Editór        : Cancio Ximenes