Governu garante nafatin povu nia kualidade moris liuhusi alokasaun OJE 2027
Primeiru-Ministru, Kay Rala Xanana Gusmão, hateten ho alokasaun Orsamentu Jerál Estadu (OJE) hamutuk billaun $2.568 ne’e, Governu sei esforsu no garante nafatin ba povu nia kualidade moris.
Xanana hato’o agradesimentu ba intervensaun sira kona-ba frajilidade ne’ebé iha no sira sei buka katak bainhira Parlamentu Nasionál aprova OJE 2027 Governu sei haree kestaun sira hotu no sei hadi’a nafatin.
“Loos duni problema ita-nia ne’e mak kualidade moris povu nian sei aat nafatin. Maibé bainhira ita iha mentalidade atu krítika, rekomendasaun, xamada atensaun sira-ne’e hotu ita simu hodi hala’o di’ak liután ita-nia servisu,” Xefe Governu deklara durante debate OJE 2027 iha Parlamentu Nasionál, ohin.
PM Xanana konsidera loos tanba bainhira tau lema ba iha OJE 2027 ne’e bele sai hanesan mehi, karik laiha mehi mak problema boot. Mehi mak erói barak mate ho mehi ukun-an, agora iha independénsia ona entaun oinsá mak atu dezenvolve.
“Bainhira iha problema tenke ko’alia atu ita bele hadi’a iha ita-nia servisu ba rai ida-ne’e nomós ba povu ida-ne’e. Ami rekoñese kata ami labele halo buat hotu, maibé ami buka saida mak ami bele halo,” Xanana dehan.
Nia hatutan, preokupasaun hotu husi distintu deputadu sira Governu sei tau konsiderasaun no deskulpa labele resposta pergunta hotu tanba iha faze espesialidade mak Governu sei resposta ho espesifikamente tuir área ida-ida nian.
“Ohin loron ikus ba debate jeneralidade OJE 2027 nian, tanba ne’e ami hato’o agradese tebes ba partisipasaun deputadu sira husi bankada opozisaun,” nia énfaze.
Deklarasaun ne’e hotu Xefe Governu resposta bazeia ba intervensaun husi Deputada opozisaun bankada PLP, Maria Angelina Sarmento, dehan bankada opozisaun ho responsabilidade sempre tau enfaze katak OJE la’ós haree de’it kona-ba osan hira mak hasai ona, hira mak aprova iha PN no hira mak ezekuta, maibé nia impaktu ba povu.
“Povu nia desizaun fó fiar ba Partidu CNRT Governa hahú iha 2007-2012, 2012-2017, 2018-2020 no 2023-2027, signifika ita boot sira asume mandatu ba da-haat,” Deputada ne’e afirma.
Nia deha,. CNRT ukun kle’ur liu no esperiénsia ukun barak liu maibé infelizmente husik hela legadu hanesan númeru pobreza aas, pobreza multidimensionál aas, númeru ema hamlaha aas.
“Ami aprezenta krítika konstrutiva ho responsabilidade, signifika ami ajuda fó hanoin ba Governu atu hadi’a,” nia dahan.
Tanba ne’e, nia nia rekomenda ba Governu atu kontinua investe iha setór produtivu atu garabte nafatin diversifikasaun ekonomia iha Timor-Leste, tanba tenke kondiz ho lema OJE 2027 ne’ebé dehan katak “Atu reforsa Reziliénsia liuhusi Transformasaun: Diversifika Ekonomia ba Futuru Sustentável”.
Jornalista : Alexandra da Costa
Editór : Cancio Ximenes
