Jenerál Tailándia vizita hikas fatin servisu antigu iha Baukau

November 11, 2026
11:06 PM
Facebook Instagram X WhatsApp Telegram

*Xefe Forsa Armada Reál Tailándia, Jenerál Ukrit Boontanondha, halo inspesaun ba parada militár bainhira vizita Komponente Terrestre Lanud, Kuarta (11/10/2026). Imajen TATOLI/Natalino Belo*

BAUKAU, 11 Novembru 2026 (TATOLI)—Xefe Forsa Defeza Reinu Tailándia, Jenerál Ukris Boontanondha, vizita filafali fatin ne’ebé nia uluk hala’o servisu iha Baukau, bainhira partisipa iha misaun manutensaun pás iha Timor-Leste.

Iha vizita ne’ebé hala’o iha Komponente Terrestre FALINTIL–Forsa Defeza Timor-Leste (F-FDTL), Lanud, Baukau, Kuarta ne’e, Jenerál Ukris Boontanondha akompaña husi nia espoza, Paweena Boontanondha.

Delegasaun ne’e simu ho onra militár liuhusi formatura ne’ebé lidera husi Komandante Komponente Terrestre, Koronél Infantaria Operasaun Espesiál, Domingos da Costa Soares ‘Dobu’, antes hala’o enkontru ho ofisiál sira.

Hafoin enkontru, Jenerál Ukris ho nia delegasaun kontinua vizita área sira iha Komponente Terrestre, inklui eskritóriu, dormitóriu no aeroportu, hodi haree no lembra filafali fatin sira-ne’ebé nia uluk uza durante hala’o misaun manutensaun pás iha Timor-Leste.

“Vizita ne’e nia hakarak mai Baukau atu haree fatin ne’ebé nia uluk hala’o servisu,” Komandante Komponente Terrestre, Koronél Domingos da Costa Soares ‘Dobu’, hateten ba TATOLI iha Lanud.

Dobu esplika katak vizita ba Baukau ne’e parte husi programa vizita Jenerál Ukris ba Timor-Leste. Molok ne’e, Jenerál Ukris hala’o ona vizita ofisiál ba Kuartél Jerál F-FDTL iha Fatuhada, Dili, no hasoru-malu ho Xefe Estadu-Maiór Jenerál F-FDTL, Tenente Jenerál Domingos Raul ‘Falur Rate Laek’, no Primeiru-Ministru, Kay Rala Xanana Gusmão.

Aleinde vizita ba Komponente Terrestre, sira mós hala’o enkontru hodi diskute planu kooperasaun iha futuru, liuliu iha ámbitu relasaun entre nasaun rua no kooperasaun ho nasaun membru Asosiasaun Nasaun Sudeste Aziátiku (ASEAN-sigla ingleza).

“Vizita ne’e mós atu haree kontinuidade kooperasaun ne’ebé bele fó apoiu ba ami iha futuru,” Dobu akresenta.

Entretantu, durante vizita ba Timor-Leste, Jenerál Ukris Boontanondha hala’o enkontru bilaterál ho Xefe Estadu-Maiór Jenerál F-FDTL, Tenente Jenerál Falur Rate Laek, no autoridade Governu Timor-Leste, inklui Primeiru-Ministru Xanana Gusmão, hodi hametin kooperasaun militár entre nasaun rua.

Kontestu

Tailándia iha ligasaun istórika ho Timor-Leste liuhusi partisipasaun membru Forsa Armada Tailándia iha misaun manutensaun pás no harii pás entre 1999 no 2002. Iha períodu ne’ebá, militár Tailándia sira fó kontribuisaun ba esforsu internasionál hodi hametin pás no estabilidade iha Timor-Leste.

Iha 10 Novembru 2026, Xefe Estadu-Maiór Jenerál F-FDTL, Tenente Jenerál Falur Rate Laek, simu vizita kortezia husi Jenerál Ukris Boontanondha iha Kuartél Jerál F-FDTL, Fatuhada, Dili. Iha enkontru ne’e, sira diskute preparasaun atu asina kuadru kooperasaun militár entre nasaun rua iha fulan-Marsu 2027, inklui área formasaun, kapasitasaun no dezenvolvimentu rekursu umanu militár.

Klik notísia relevante sira iha kraik hodi lee: