Konsumidór bee-moos iha Vikeke kontribui US$26.342 ba kofre Estadu

November 11, 2026
08:23 PM
Facebook Instagram X WhatsApp Telegram

*Koordenadór BTL, E.P, Marito da Costa. Imajen TATOLI/Vitorino Lopes da Costa*

VIKEKE, 11 Novembru 2026 (TATOLI)—Bee Timor-Leste, Empreza Públika (BTL, E.P.) Munisípiu Vikeke rekolla reseita hamutuk US$26.342,00 husi taxa utilizasaun bee-moos durante fulan-Janeiru to’o Outubru 2026 ba kofre Estadu.

Koordenadór BTL, E.P. Munisípiu Vikeke, Marito da Costa, informa katak reseita ne’e maihusi pagamentu taxa konsumidór sira-ne’ebé uza bee-moos liuhusi kontadór ne’ebé instala ona iha uma-kain sira iha munisípiu ne’e.

“Kona-ba rekolla reseita taxa bee hahú husi fulan-Janeiru to’o fulan-Outubru, ami konsege rekolla hamutuk US$26.342,00 ba kofre Estadu. Taxa hirak-ne’e maihusi kliente utilizadór kontadór ne’ebé ami instala ona iha kada uma-kain iha Munisípiu Vikeke,” Marito da Costa hateten ba TATOLI, iha Postu Administrativu Vikeke Vila, Kuarta ne’e.

Marito esplika katak maski BTL, E.P. Munisípiu Vikeke konsege rekolla reseita ne’e durante fulan sanulu, maibé bá-oin reseita bele tun tanba impaktu hosi bailoron naruk ne’ebé afeta rekursu bee-matan Loihunu.

Nia hateten katak fulan kotuk débitu bee-matan Loihunu hela iha litru 17 kada segundu (LPS), maibé agora débitu tun tan ba LPS 8.

“Ho débitu bee ne’ebé tun ona, ida-ne’e sei afeta ita-nia reseita. Tanba impaktu bailoron naruk afeta tebes rekursu bee-matan Loihunu. Nune’e, bá-oin reseita sei tun nafatin to’o fulan-Abríl, bazeia ba disponibilidade rekursu bee. Ita labele halo buat ruma tanba bee ne’e maihosi rekursu naturál,” nia realsa.

Marito informa katak konsumidór sira-ne’ebé kontribui ba pagamentu taxa bee-moos ne’e mai hosi postu administrativu tolu, mak Postu Administrativu Vikeke Vila ho uma-kain 703, Ossú ho uma-kain 413 no Lakluta ho uma-kain 551.

Tuir dadus ne’ebé BTL, E.P. Munisípiu Vikeke aprezenta, reseita ne’ebé rekolla kada fulan hahú hosi Janeiru to’o Outubru 2026 mak hanesan: Janeiru US$2.555,65, Fevereiru US$1.881,75, Marsu US$2.185,25, Abríl US$2.838,25, Maiu US$3.531,30, Juñu US$2.906,40, Jullu US$2.435,60, Agostu US$3.159,40, Setembru US$2.556,65 no Outubru US$2.291,75.

Kontestu

Antes ne’e, iha 29 Outubru 2026, BTL, E.P. Munisípiu Vikeke informa katak bailoron naruk hamenus débitu bee iha rekursu bee-matan Loihunu, ne’ebé fornese bee-moos ba komunidade iha Postu Administrativu Vikeke Vila.

Iha tempu udan, bee-matan Loihunu nia débitu to’o LPS 120, maibé iha tempu bailoron débitu tun ba LPS 17. Kondisaun ne’e obriga BTL atu hamenus oras distribuisaun bee ba konsumidór sira hosi oras ualu ba oras neen kada loron.

Klik notísia relevante sira iha kraik hodi lee: