MJDAK aloka US$4.000 ba Sentru Juventude Vikeke Komemora Aniversáriu 12 Novembru ba da-35

November 11, 2026
10:44 PM
Facebook Instagram X WhatsApp Telegram

*Diretór Sentru Juventude Munisípiu Vikeke, Januário Benivides de Araújo. Imajen TATOLI/Vitorino Lopes da Costa*

VIKEKE, 11 Novembru 2026 (TATOLI)—Governu Timor-Leste liuhusi Ministériu Juventude, Desportu, Arte no Kultura (MJDAK), aloka apoiu finanseiru hamutuk US$4.000 ba Sentru Juventude (SJ) Munisípiu Vikeke hodi suporta atividade Komemorasaun Masakre Santa Krúz ba da-35 (12 Novemer1991–12 November 2026).

Diretór Sentru Juventude Munisípiu Vikeke, Januário Benivides de Araújo, hateten katak MJDAK kontinua fó apoiu finanseiru ba komemorasaun tinan ida-ne’e, ne’ebé sei hala’o iha postu administrativu lima iha munisípiu ne’e.

“Ba komemorasaun Loron 12 Novembru tinan ida-ne’e, ami hetan apoiu finanseiru hosi MJDAK hamutuk US$4.000. Orsamentu ne’e ami sei fahe ba postu administrativu idaidak hodi suporta realizasaun atividade komemorasaun,” Januário Benivides de Araújo hateten ba TATOLI, iha Postu Administrativu Vikeke Vila, Kuarta ne’e.

Benivides esplika katak atividade komemorasaun sei inklui semináriu, misa no serimónia kari ai-funan, ne’ebé sei realiza iha postu administrativu lima iha Munisípiu Vikeke.

Komemorasaun tinan ida-ne’e ho tema jerál “Ho Espíritu 12 Novembru nian, Ita Hamutuk Harii Pás no Autór ba Dezenvolvimentu Sustentável”, ho objetivu atu aumenta partisipasaun inkluziva no sensivel ba dezenvolvimentu nasionál.

“Komemorasaun Loron 12 Novembru importante tebes ba jerasaun foun sira, atu sira bele banati tuir sakrifísiu no luta husi as’uain sira iha tempu rezisténsia, ne’ebé fakar raan ba rai ida-ne’e. Luta ne’ebé Juventude Loriku As’uain sira halo iha tempu uluk sai nu’udár fundasaun ba jerasaun foun sira ohin loron,” nia hato’o.

Nune’e, nia husu ba juventude hotu iha Munisípiu Vikeke atu partisipa ativu iha serimónia komemorasaun ne’ebé sei realiza iha kada postu administrativu, tanba Loron 12 Novembru nu’udár loron istóriku ne’ebé fó-hanoin ba sakrifísiu no luta Juventude Loriku As’uain sira-nian ba ukun-rasik-an.

Kona-ba fahe orsamentu, Sentru Juventude aloka US$710 ba kada postu administrativu lima, mak Uatulari, Uatukarbau, Lakluta, Ossú no Vikeke. Aleinde ne’e, Sentru Juventude mós aloka US$500 ba orsamentu operasionál hodi halo monitorizasaun ba atividade komemorasaun iha postu administrativu lima ne’e.

Kontestu

Masakre Santa Krúz akontese iha 12 Novembru 1991, bainhira militár Indonézia reprime manifestasaun juventude timoroan sira-ne’ebé la’o hosi Igreja Motael ba Semitériu Santa Krúz, iha Dili, hodi lori ai-funan bá rate Sebastião Gomes.

Akontesimentu ne’e sai nu’udár momentu importante iha istória luta libertasaun nasionál Timor-Leste, no kontribui atu lori realidade okupasaun Indonézia nian ba atensaun komunidade internasionál. Sakrifísiu juventude Loriku As’uain sira-nian kontinua sai inspirasaun ba jerasaun foun atu valoriza liberdade, unidade no dezenvolvimentu nasaun.

Klik notísia relevante sira iha kraik hodi lee: