Projetu alargamentu estrada afeta uma-kain 68 iha Caicoli
DÍLI, 11 Novembru 2026 (TATOLI) – Uma-kain 68 iha Suku Caicoli, Munisípiu Dili, sei hetan impaktu hosi projetu alargamentu estrada ne’ebé implementa husi Ministériu Obras Públikas (MOP).
Xefe Suku Caicoli, Hipolito M. Sarmento, informa katak, hosi total uma-kain na’in 68 ne’ebé afetadu, uma-kain na’in 43 nia uma ekipa MOP sobu ona, no família sira simu ona indemnizasaun iha fulan kotuk.
Nia esplika katak, obra alargamentu estrada ne’e hala’o hela hosi edifísiu Rádio no Televizaun Timor-Leste (RTTL) to’o estrada prinsipál Balide.
Enkuantu, uma-kain na’in 25 seluk ne’ebé hela iha área entre Edifísiu Sentral Eletrisidade Caicoli no Institutu Superior Cristal, foin hetan marka iha fulan Outubru kotuk. Uma sira ne’e sei tama iha prosesu demolisaun iha inísiu 2027.
“Komunidade hotu-hotu aseita projetu ne’e, maibé buat importante mak Governu tenke selu indemnizasaun ba uma sira ne’ebé atu sobu, atu nune’e família sira bele buka fatin seluk hodi harii fali sira-nia uma,” Hipolito M. Sarmento dehan ba TATOLI, iha Sede Suku Caicoli, Díli.
Nia hatutan katak, uma-kain na’in 25 ne’ebé foin hetan marka iha fulan Outubru kotuk, agora dadaun submete hela dokumentu nesesáriu sira, inklui kartaun eleitorál no konta bankária ba iha Sede Suku Caicoli.
Dokumentu hirak ne’e sei uza atu prepara termu aseitasaun antes autoridade sira hahú prosesu despeju administrativu.
Jornalista: Camilio de Sousa
Editór: Filomeno Martins
