Tailándia-TL planeia selebra akordu ba dezenvolvimentu kapasidade-kualifikasaun seguransa iha forsa armada
DILI, 11 Novembru 2026 (TATOLI)—Tailándia no Timor-Leste planeia asina nota entendimentu (MoU) ba dezenvolvimentu kapasidade no kualifikasaun seguransa iha forsa armada, iha kontestu selebrasaun tinan 25 ba relasaun diplomátika entre nasaun rua.
Xefe Forsa Defeza Reinu Tailándia, Jenerál Ukris Boontanondha, hateten iha okaziaun ninia viajen mai Timor-Leste, iha oportunidade atu hasoru ho Primeiru-Ministru, Kay Rala Xanana Gusmão, hodi halo diálogu kona-ba harii relasaun no kooperasaun entre Tailándia no Timor-Leste.
Iha enkontru ne’e, sira diskute asuntu barak ne’ebé iha interese komún ba nasaun rua, inklui mós planu ba tinan oin mai, ne’ebé sei selebra tinan 25 ba relasaun diplomátika entre Tailándia no Timor-Leste.
“Atu selebra tinan 25 ne’e, ami sei prepara Memorandu Entendimentu (MoU) kona-ba dezenvolvimentu kapasidade no kualifikasaun pesoál husi forsa armada nasaun rua. MoU ne’e sei kobre área sira hanesan Edukasaun no formasaun, Operasaun manutensaun dame (Peacekeeping Operations), Interkámbiu péritu sira tuir área interese komún,” Jenerál Forsa Defeza ne’e deklara ba jornalista sira iha Palásiu Governu, ohin.
Iha oportunidade importante ida-ne’e, nia dehan, sira hakarak tau hanoin hamutuk kona-ba oinsá komunidade Tailándia no Timor-Leste bele hametin kooperasaun iha área oioin, hanesan edukasaun no área sira seluk ne’ebé fó benefísiu ba povu husi nasaun rua.
Nia hatutan, sira sei estabelese mekanizmu ida atu promove no asegura implementasaun atividade sira-ne’ebé nia temi ona. Aleinde ne’e sira diskute mós kona-ba kooperasaun iha área dezenvolvimentu kapasidade atu mantein estabilidade no seguransa iha Timor-Leste.
“Ida-ne’e inklui kontribuisaun ne’ebé Forsa Armada Tailándia fó ona durante períodu sira liubá. Ami aprofunda tan diskusaun kona-ba área interese komún, inklui dezenvolvimentu kapasidade pesoál iha operasaun manutensaun dame,” nia subliña.
Iha realidade, Tailándia fó ona formasaun kona-ba operasaun manutensaun dame ba pesoál Timor-Leste. Maibé, iha enkontru ne’e, zira diskute tan kona-ba oinsá atu aumenta kooperasaun iha área ida-ne’e.
Iha futuru, nia dehan, sira bele konsidera atu konvida pesoál Timor-Leste partisipa iha atividade ka operasaun manutensaun dame iha nivel internasionál.
“Kooperasaun iha área Ajuda Umanitária Kona-ba dezenvolvimentu kapasidade atu fó asisténsia ba povu, Forsa Armada Tailándia no Forsa Armada Timor-Leste bele halo kooperasaun hamutuk,” nia afirma.
Tanba, nia dehan, iha Tailándia ne’e sira iha sentru formasaun ne’ebé oferese programa treinamentu kona-ba asisténsia umanitária no ajuda ba populasaun, formasaun hirak-ne’e realiza dala barak kada tinan.
“Nune’e iha enkontru Xefe Governu fó hanoin katak kooperasaun iha área asisténsia umanitária tenke dezenvolve liuhusi asaun hamutuk entre grupu rua. Nia hakarak atu kria kooperasaun ne’ebé Forsa Armada nasaun rua bele servisu hamutuk iha misaun ida de’it, la presiza fahe servisu ka responsabilidade entre parte rua,” nia haktuir.
Kona-ba dezenvolvimentu kapasidade ne’ebé inklui asisténsia umanitária, nia hateten, Tailándia no Timor-Leste bele servisu hamutuk tanba iha Tailándia ne’e sira iha sentru formasaun ne’ebé organiza treinamentu kada tinan.
“Ha’u hanoin katak importante tebes atu nasaun rua kontinua servisu hamutuk no hametin kooperasaun iha área hirak-ne’e,” nia dehan.
Jornalista : Alexandra da Costa
Editór : Cancio Ximenea
