Vikeke prontu hasoru Dili Oeste iha finál Kopa Juvenil U-17 2026
DILI, 11 Novembru 2026 (TATOLI)—Ekipa U-17 Munisípiu Vikeke sente todan maibé prontu atu kompete kontra ekipa U-17 Dili Oeste iha jogu finál Kopa Juvenil U-17 2026 no jogu finál ne’e sei hala’o iha Kuarta (12/11) kalan, iha Kampu FFTL, Bairru dos Grilhos, Dili.
Treinadór Vikeke, Justino Baptista Brandão, hateten ninia ekipa futeból mai husi Vikeke ho objetivu ida de’it mak hakarak atu manán.
“Aban, ami sei hasoru Dili Oeste, ami sente todan maibé prontu atu compete. Ami mai husi Vikeke ho objetivu ida atu manán,” Justino hateten ba jornalista sira iha edifísiu FFTL, Dili, Tersa ne’e.
Nia rekoñese, tempu deskansa ba jogadór sira badaktebe-tebes maibé la sai razaunba sira atu ta’uk.
“Horisehik ami hasoru Aileu, ami konsege manán sira iha semi finál. Tempu deskansa loron ida de’it hasoru kedan Dili Oeste, maibé ami la ta’uk tanba sira mós deskansa loron ida de’it hanesan ho ami,” nia dehan.
Justino mós hateten, nia orgullu ho nia jogadór sira tanba sira iha vontade maka’as atu hatudu jogu bonitu.
“Ha’u orgullu ho ha’u-nia jogadór sira, sira iha duni vontade maka’as hatudu jogu bonito. Maske aban hasoru ekipa Dili ne’ebé ho materia jogu ne’ebé kualidade, ida-ne’e la sai obstákulu ba ami, minutu 90 iha kampu laran mak sei termina,” nia subliña.
Vikeke hakat ba finál hafoin manán Aileu ho eskoru 4-0 iha semi finál, iha Tersa kalan no iha parte seluk, Dili Oeste haka’at ba finál hafoin manán RAEOA (Oekusi) ho eskoru 4-0.
Ekipa rua ne’e sei hasoru malu hodi determina sé mak sei sai kampeaun ba Kopa Juvenil U-17 2026, ne’ebé finansia direta husi Federasaun Futeból Timor-Leste (FFTL).
Vikeke-Dili Oeste hakat ba Finál Kopa Juvenil U-17 2026
Kompetsisaun Jogu semi finál Kopa Juvenil U-17 2026 ramata ona iha Tersa (10/11) kalan, iha Kampu FFTL, Bairru dos Grilhos, Dili, ne’e lori ekipa U-17 husi Munisípiu Vikeke no ekipa U-17 Dili Oeste konsege manán jogu hodi hakat ba finál.
Vikeke Manán Aileu 4-0
Iha jogu semi finál dahuluk, Vikeke manán Aileu ho eskoru 4-0. Vikeke hatudu jogu ne’ebé di’ak tebes, husi minutu dahuluk to’o minutu ikus, no konsege hatama golu 4 sein hetan golu kontra.
Antes jogu, Treinadór Vikeke, Justino Baptista Brandão, fiar ona katak nia ekipa sei manán.
“Ami preparadu, minutu 90 iha kampu laran mak sei termina, ha’u tau konfiansa tomak ba jogadór sira, ami sei manán jogu ne’e,” Justino hateten ba jornalista sira antes jogu.
Nia mós hateten, jogu ne’e importante atu promove jogadór sira-nia talentu, atu sira bele hetan oportunidade tama iha selesaun nasionál hodi ba joga iha rai-li’ur.
Iha parte seluk, Treinadór Aileu, Hercio Araujo Carlos, antes jogu hateten nia ekipa preparadu másimu, maibé rezultadu iha kampu laran mak determina.
“Buat hotu minutu 90 mak sei termina, lakon ka manán durante jogu nia laran mak sei determina,” nia dehan.
Dili Oeste Manán RAEOA 4-0
Iha jogu semi finál daruak, Dili Oeste manán RAEOA (Oekusi) ho eskoru 4-0, maske Dili Oeste mós hatudu jogu ne’ebé forte no konsege manán ho golu boot hanesan Vikeke.
Antes jogu, Treinadór Dili Oeste, Fabrisio Fereira, hateten nia ekipa iha matéria jogu ne’ebé di’ak no otimista sei manán.
“Ami iha matéria jogu ne’ebé di’ak. Ami mós otimista katak sei manán sira, maibé ne’e hanoin de’it. Iha jogu laran ne’e minutu 90 mak sei termina,” Fabrisio hateten.
Tuir planu, jogu finál ba ekipa rua sei hala’o iha Kampu FFTL, Dili, kinta (12/11) kalan no jogu semi finál Kopa Juvenil U-17 2026
Jornalista : Hortêncio Sanchez
Editór : Cancio Ximenes
