Xanana rekoñese literasia-numerasia sai problema boot ba setór edukasaun iha TL
DILI, 11 Novembru 2026 (TATOLI)—Primeiru-Ministru, Kay Rala Xanana Gusmão, rekoñese katak literasia no numerasia ba estudante ho idade kiik sira sei sai problema boot ba setór edukasaun iha Timor-Leste.
“Husu mós ba Ministériu Edukasaun atu kontinua tau atensaun ba sala-de-aula no professor sira, atu esforsu hadi’a kualidade edukasaun,” Primeiru-Ministru relata iha diskusaun OJE 2027 iha Parlamentu Nasionál, ohin.
Xefe Governu dehan, literasia no numerásia sei sai problema boot ba prosesu aprendizajen tanba estudante sira ho idade kiik sira sura númeru la’ós ho lian portugés no tetun maibé uza fali lian Indonézia.
“Ita haruka labarik sira sura númeru, sira temi fali satu, dua tiga, entaun literásia no numerasia problema. Ne’ebé problema ita-boot nian (ME) maibé ami sei kontinua nafatin hadi’a pelumenus iha tinan 50 bele iha netik mudansa,” PM Xanana apela.
Iha oportunidade ne’e, jornalista konfirma kedas Ministra Edukasaun, Dulce de Jesus, afirma katak relasiona ho preokupasaun husi Primeiru-Ministru, Kay Rala Xanana Gusmao nian, sira promete katak Ministériu nafatin kontinua servisu bazeia ba planu ne’ebé mak iha atu halo esforsu hodi hasa’e kualidade formasaun ba profesór eskola ensinu pré-eskolár to’o eskola ensinu sekundária jerál, inklui ensinu sekundária tékniku vokasionál iha territóriu laran tomak.
“Ita halo mós previzaun kurrikulu nomós estabelese dedolójika (regra) inklui fó asisténsia ba profesór sira iha prosesu aprendizajen hodi garante kualidade edukasaun iha futuru oin mai maske sei hasoru dezafiu boot maibé ita tenta atu rezolve tuir ninia faze,” Ministra ne’e subliña.
Tanba ne’e, nia promete katak ba oin sira sei kontinua mellora atividade ne’ebé implementa ona liuhusi formasaun no matéria dedolójika iha tinan 2026 sei kontinua iha tinan 2027 no sei implementa kompeténsia profesór sira hodi hasa’e kapasidade no hasa’e koñesimentu iha matéria hotu hotu.
Jornalista : Alexandra da Costa
Editór : Cancio Ximenes
