Xefe Suku husu reabilitasaun ba sistema drenajen iha residensiál Caicoli
DÍLI, 11 Novembru 2026 (TATOLI) – Xefe Suku Caicoli, Hipolito M. Sarmento, husu Governu, liuhosi Ministériu Obras Públikas (MOP), atu reabilita sistema drenajen antigu sira iha área residensiál Caicoli, ne’ebé konstrui durante okupasaun Indonézia.
Nia dehan reabilitasaun ba baleta tuan sira ne’e importante hodi prevene inundasaun iha tempu udan.
Hipolito esplika katak, Governu hahú ona konstrusaun no reabilitasaun sistema drenajen iha estrada prinsipál sira, maibé baleta iha área residensiál no dalan sekundáriu iha Suku Caicoli seidauk hetan reabilitasaun.
Nia konsidera katak, situasaun ne’e bele aumenta risku inundasaun, liuliu durante tempu udan, bainhira sistema drenajen la konsege lori bee sai ho di’ak.
“Suku Caicoli lokaliza iha sentru kapital Dili. Governu hahú ona konstrui baleta iha estrada prinsipál sira, maibé iha área residensiál seidauk. Tanba ne’e, hau husu Governu, liuhosi Ministériu Obras Públikas, atu reabilita mós baleta sira iha bairro laran. Se lae, bee bele nakonu no tama ba komunidade nia uma tanba baleta sira intupidu,” Hipolito dehan ba TATOLI, iha Sede Suku Caicoli, Dili, kuarta-feira.
Hipolito enfatiza katak, reabilitasaun sistema drenajen tenke sai prioridade no konsidera Suku Caicoli nu’udar área ne’ebé presiza reabilitasaun.
Tanba ne’e, nia husu autoridade sira atu la’ós foka de’it ba estrada prinsipál, maibé tenke estende intervensaun ba dalan sekundáriu no área residensiál iha suku ne’e.
Aleinde husu intervensaun Governu, nia mós apela ba komunidade atu servisu hamutuk ho autoridade lokál hodi hamos sistema drenajen, no la soe fo’er ba iha baleta sira.
Nia fiar katak, reabilitasaun ba sistema drenajen antigu sira ne’e, se implementa ho planeamentu no manutensaun ne’ebé adekuadu, bele hadi’a bee nia dalan, hamenus risku inundasaun no proteje komunidade husi impaktu udan boot.
Jornalista: Camilio de Sousa
Editór: Filomeno Martins
