APA Bobonaru husu joven sira sai protagonista ba dezenvolvimentu nasaun
BOBONARU, 12 Novembru 2026 (TATOLI) – Administradór Postu Administrativu Bobonaru, Munisípiu Bobonaru, Tomás Barreto Henriques, husu ba juventude atu kontinua dezenvolve kapasidade no partisipa ativa iha prosesu konstrusaun Estadu, hodi hatutan espíritu luta no sakrifísiu asu’ain sira ne’ebé luta ba independénsia Timor-Leste.
Tomás Barreto hato’o mensajen ne’e bainhira partisipa iha serimónia komemorasaun loron 12 Novembru, ne’ebé hala’o iha Postu Administrativu Bobonaru, hodi hanoin filafali luta no sakrifísiu juventude timoroan sira iha Masakre Santa Krús, Dili, iha 12 Novembru 1991.
Nia esplika katak, loron 12 Novembru nu’udar momentu importante ida ba povu Timor-Leste, tanba juventude sira iha tempu ne’ebá hatudu korajen no unidade hodi manifesta sira-nia aspirasaun ba liberdade, liuhusi manifestasaun dame ho bandeira, panfletu no liafuan sira ne’ebé lori mensajen ba mundu.
Notísia relevante: Reflesaun dalan ba ukun rasik-an liuhusi Masakre 12 Novembru
“Loron ohin ita hamutuk la’ós atu festa, maibé atu hanoin filafali sira-nia luta. Prezensa ita-nian iha serimónia hanesan ne’e mak forma ida atu valoriza sira-nia luta naruk, ne’ebé hahú husi 1991 to’o ita hetan independénsia”, nia dehan hafoin partisipa iha misa agradesimentu no kari ai-funan iha monumentu Kavalaria 5 Bobonaru, kinta-feira ne’e.
Nia hatutan katak, juventude sira iha tempu okupasaun hatudu unidade no solidariedade, la haree ba diferensa kór, grupu ka orientasaun, maibé hamutuk ho objetivu ida atu liberta rai Timor-Leste, hodi reforsa luta armada no luta diplomátika.
Tanba ne’e, nia enkoraja foinsa’e sira atu kontinua dezenvolve-an, hetan koñesimentu no partisipa iha programa no planu dezenvolvimentu Governu nian, hodi kontribui ba konstrusaun nasaun ho dame, estabilidade no matenek, inklui dezenvolvimentu munisípiu Bobonaru.
Nia argumenta katak joven mak ajente ba mudansa, tanba ne’e tenke sai autór prinsipál ba kualkér atividade no programa nia, labele haree de’it husi dook ka hein de’it rezultadu.
“Ha’u enkoraja foinsa’e sira atu nafatin dezenvolve-an no partisipa iha konstrusaun Estadu ne’e, importante la halimar, iha kualkér planu no programa Governu nia hotu-hotu, ita hatutan ida-ne’e ho pás, dame ba ita-nia rai, ho matenek oinsá mak kontinua Asu’ain sira-nia luta sira ne’e ba oin hodi halo mudansa ba ita-nia pais, espesiál ba rai Bobonaru”, Tomás dehan.
Iha parte seluk, reprezentante juventude Bobonaru, Delfim de Jesus, orgullu no apresia ba korajen no sakrifísiu asu’ain sira ne’ebé dedika sira-nia moris hodi luta ba independénsia Timor-Leste.
Nia konsidera katak, sakrifísiu no espíritu nasionalizmu no patriotizmu ne’ebé asu’ain sira hatudu sai nu’udar inspirasaun importante ba jerasaun foun atu kontinua kontribui ba dezenvolvimentu nasaun.
“Asu’ain sira ne’ebé iha aten-brani atu dedika no sakrifika sira-nia an ba luta independénsia. Ida-ne’e sai motivasaun ba ami jerasaun foun atu kontinua hatutan espíritu nasionalizmu no patriotizmu, hodi dezenvolve ita-nia nasaun sai país ida ne’ebé dame no prósperu”, nia afirma.
Komemorasaun loron 12 Novembru iha Postu Administrativu ne’e sai nu’udar momentu atu hanoin filafali istória luta povu Timor-Leste nian no haforsa konxiénsia jerasaun foun kona-ba importánsia unidade, dame no responsabilidade iha konstrusaun nasaun.
Komemorasaun ne’e hala’o ho semináriu, kompetisaun diskursu públiku, reflesaun, misa agradesimentu no kari ai-funan no program ne’e realiza hetan apoia orsamentu husi Governu ho montante orsamentu $750.
Notísia relevante: Autoridade Bobonaro sei sosializa loron masakre 12 novembru iha baze
Jornalista: Sergio da Cruz
Editora: Maria Auxiliadora
