Governu autoriza Ministra Finansa negosia ho Banku Mudiál ba projetu infraestrutura iha TL

DILI, 16 Novembru 2026 (TATOLI)—Governu liuhusi reuniaun Konsellu Ministru, segunda ne’e, delibera hodi autoriza Ministra Finansa, Santina Cardoso, atu halo negosiasaun ba akordu kréditu ida ho Asosiasaun Internasionál Dezenvolvimentu (IDA), entidade ne’ebé pertense ba Grupu Banku Mundiál, ho montante millaun $39, hodi finansia projetu daruak estrada sekundária Timor-Leste nian (Second Timor-Leste Branch Roads Project – TLBRP2).
Projetu ne’e ho objetivu atu hadi’a ligasaun rodoviária sira no fasilita asesu ba populasaun liuliu produtór agríkola sira ba merkadu no servisu esensiál sira liuhusi intervensaun iha sesaun selesionadu sira husi korredór Glenu-Maubisse.
Intervensaun sira-ne’ebé planeadu inklui hadi’a maizumenus kilómetru 12 husi estrada entre Aitutu no kruzamentu Hatubuiliku, kilómetru 5,4 husi ligasaun entre kruzamentu ida-ne’e ho Santuáriu Ramelau nomós ponte neen.
Ministru Obra Públika, Samuel Marçal, hateten ohin mós husu autorizasaun ba negosiasaun ho Banku Mundiál, maske ne’e kompeténsia husi MInistériu Finansa maibé iha relasaun mós ho MOP.
“Akordu kréditu ne’e atu husu kona-ba projetu estrada Hatubuiliku ba Aitutu, bee-moos iha Baukau inklui ponte sira. Ne’ebé ida-ne’e la’ós aprovizionamentu maibé autorizasaun akordu (MoU) ho Banku Mundiál,” Ministru ne’e relata ba jornalista sira iha Palásiu Governu, ohin.
Aleinde sira planeia ona mós medida seguransa rodoviária, drainajen no adaptasaun ba risku klimátiku sira, aleinde asaun sira ba reforsu institusionál setór rodoviáriu nian.
Jornalista : Alexandra da Costa
Editór : Cancio Ximenes

