Top

Governu planeia hahú konstrusaun estrada diresaun Sagrada Família – Terminal Becora

Foto: Camilio de Sousa

DÍLI, 16 Novembru 2026 (TATOLI) – Uma-kain na’in 96 iha Aldeia Sakrada Família, Suku Bidau Santa Ana, Postu Administrativu Cristo Rei, Munisípiu Dili, sei hetan impaktu husi projetu konstrusaun estrada foun ne’ebé sei liga Aldeia Sagrada Família ho Terminal Becora. Governu planeia atu hahú implementa projetu ne’e iha inísiu fulan Marsu 2027.

Xefe Suku Bidau Santa Ana, Alexandrino Mesquita da Costa Braz, hateten katak Governu halo ona preparasaun atu konstrui estrada foun ne’e, ho objetivu atu kria dalan alternativa ba motorista sira, liuliu atu hamenus engarrafamentu iha dalan prinsipál.

Nia esplika katak iha fulan Setembru liubá, Sekretaria Estadu Asuntu Toponímia (SEATOU), hamutuk ho Ministériu Obras Públikas (MOP), hala’o ona diálogu ho komunidade sira ne’ebé sei hetan impaktu direta husi projetu ne’e.

Iha diálogu ne’e, komunidade sira manifesta prontidaun atu suporta projetu dezenvolvimentu ne’e. Maski nune’e, sira husu Governu atu selu indemnizasaun uluk, antes hala’o prosesu dezpeju administrativu ba uma no rai ne’ebé sei hetan impaktu.

“Komunidade hotu-hotu aseita atu kontribui ba dezenvolvimentu, maibé sira ezije katak Governu tenke selu uluk indemnizasaun antes implementa prosesu dezpeju administrativu ba sira,” Alexandrino hateten ba TATOLI, iha Sede Suku Bidau Santa Ana, ohin.

Nia hatutan katak ekipa téknika husi MOP kontinua hala’o levantamentu dadus iha terenu, ho kolaborasaun husi komunidade sira ne’ebé sei hetan impaktu husi projetu ne’e.

“Nudar xefe suku no reprezentante komunidade afetada, hau sei orienta komunidade sira atu prepara no entrega sira-nia kartaun eleitorál no informasaun kona-ba konta bankária, hodi fasilita no aselera prosesu pagamentu indemnizasaun antes hala’o dezpeju administrativu,” nia dehan.

Iha parte seluk, reprezentante komunidade afetada, João da Costa, konfirma katak SEATOU hala’o ona diálogu ho komunidade iha fulan Setembru liubá, no husu sira atu koopera ho governu hodi disponibiliza rai ba konstrusaun estrada foun ne’e.

João konsidera katak estrada foun ne’e importante tebes tanba sei sai nu’udar dalan alternativa ba motorista sira, liuliu bainhira akontese engarrafamentu iha dalan prinsipál.

“Nu’udar sidadaun, ami prontu atu kontribui ba dezenvolvimentu, maibé Governu tenke selu uluk indemnizasaun atu ami bele buka fatin seluk hodi hela. Tanba rai balu ne’ebé ami okupa mak rai privadu, no balu seluk mak rai Estadu nian. Uma sira ne’ebé ami konstrui mós uza ami-nia osan rasik,” nia konklui.

Jornalista: Camilio de Sousa
Editór: Filomeno Martins

Publisidade

Leave a Reply

Latest Post

error: Content is protected !!