Top

Mudansa Klimátika halo bee-moos menus iha Bazartete no Fatumasi

Administradór Postu Administrativu Bazartete, João Nascimento Braz. Imajen/Espesiál.

DILI, 16 Novembru 2026 (TATOLI)—Administradór Postu Administrativu Bazartete, João Nascimento Braz, rekoñese katak problema bee-moos sai preokupasaun boot iha Bazartete, liuliu iha Suku Fatumasi, Aldeia Durbasa.

“Bee-moos hahú menus iha Suku Fatumasi Aldeia Durbasa, ida-ne’e hanoin la’ós sira de’it, maioria Suku hotu iha problema bee-moos, ida-ne’e nia kauza mai husi mudansa klimátika halo bee nia volume kiik,” Administradór ne’e hateten ba TATOLI via telefone, ohin.

Nia hatutan, problema segundu mak komunidade labele halerik demais mai Estadu liuliu ba Postu Administrativu, bainhira problema ne’e komunidade rasik bele rezolve.

“Problema segundu mak ita hatene katak, komunidade sira labele halerik demais mai Estadu liuliu Postu Administrativu. Ita-boot sia halerik bainhira iha ita-boot sira-nia fatin laiha liu ona kanalizasaun, bele husu mai Postu, se kanalizasaun liu hela husi ita-boot sira-nia uma oin tenke husu ba ida-idak nia an. Tansá bee ne’e la mai, se iha bee intupidu ruma karik, ita-boot sira laiha kapasiade atu hadi’a koordena ho ha’u Administradór Postu hodi buka solusaun,” nia dehan.

Nia esplika, se bee ne’e intupidu baibain, hamoos bee ulun ne’e komunidade bele kontribui de’it, la presiza hein Estadu mak tenke tun ba haree hotu.

“Se bee ne’e intupidu baibain, hamoos bee ulun ne’e komunidade bele kontribui de’it la presiza husu ba Estadu mak tenke tun ba haree hotu, ita iha servisu barak ne’ebé atu halo hodi atende komunidade hotu iha Bazartete,” nia dehan.

Maske nune’e, ba Aldeia Durbasa, Suku Fatumasi, Administradór garante iha 2027 sei iha programa PNDS ida atu halo reabilitasaun ba komunidade.

“Maibé ba Aldeia Durbasa Suku Fatumasi, iha 2027 ita iha programa PNDS nian ida atu halo re-abilitasaun ba komunidade sira. Programa ne’e atu tau hamutuk bee ulun Sagas ho bee ulun Bimeta mai iha Postu Bazartete. Ha’u tenta mekanizmu oinsá para bele kobre hotu ba aldeia sira hotu iha Suku Fatumasi ne’e, karik bee ne’e ho velosidade maka’as ita bele fahe mós ba Suku seluk ne’ebé besik,” nia dehan.

Postu Administrativu Bazartete kompostu husi suku sia (9) no aldeia 45. Dadus ofisiál ikus liu husi Institutu Nasionál Estatístika Timor-Leste (INETL) iha Sensu 2022 hatudu katak Bazartete iha totál populasaun 33.442.

Jornalista : Hortêncio Sanchez

Editór        : Cancio Ximenes

Publisidade

Leave a Reply

Latest Post

error: Content is protected !!