Top

PNDS iha Likisá atinje 76%, PAM garante finaliza iha Dezembru

Prezidente Autoridade Munisípiu Likisá, Paulino Ribeiro. Imajen Tatoli/Francisco Sony.

DILI, 17 Novembru 2026 (TATOLI)—Prezidente Autoridade Munisípiu (PAM) Likisá, Paulino Ribeiro, informa projetu Programa Nasionál Dezenvolvimentu Suku (PNDS) iha Likisá hamutuk 34 ne’e, daudaun ne’e atinje ona 76% no iha Dezembru sei bele finaliza.

“Projetu PNDS iha Likisá hamutuk 34, daudaun ne’e atinje ona 76%. Ita fiar katak iha Dezembru ne’e bele finaliza hotu. Projetu hirak ne’e mak harii eskola sira, refetóriu iha eskola sira atu labarik sira bele tuur hodi haan, halo mós dapur iha eskola sira no armajen sira-ne’e ba PNDS,” Prezidente Autoridade Munisípiu (PAM) Likisá, Paulino Ribeiro, hateten ba Agência TATOLI iha Likisá, tersa ne’e.

Aleinde PNDS, ba Planu Dezenvolvimentu Integradu Munisipál (PDM), PAM hateten, iha projetu sia (9) ne’ebé atinje ona 31% no agora la’o namanas hela.

“Ba Planu Dezenvolvimentu Integrál Munisipál (PDM), ita iha projetu sia (9), ne’ebé atinje ona 31%. Agora la’o namanas hela ita fiar katak iha tinan oin bele finaliza bazeia ba kontratu, ida-ne’e harii edifisiu sira,” nia esplika.

Entretantu, ba merenda eskolar iha Munisípiu Likisá, nia konfirma kata finaliza ona ho ezekusaun 100%.

“Ba merenda eskolar iha Munisípiu Likisá finaliza ona, ezekusaun 100%, agora ita hein fali tinan oin mak iha orsamentu foun bele ezekuta fali, iha tinan 2026 millaun $1.3, ita ezekuta hotu ona,” nia dehan.

Aleinde ne’e, nia informa, projetu ida mós kona-ba limpeza urbana iha dalan públiku hahú husi Loes to’o Tibar.

“Projetu ida mós kona-ba limpeza urbana iha dalan públiku hahú husi Loes to Tibar, agora ita haree dalan ninin sira mós liuliu tasi ibun sira laiha ona foer, tanba ita-nia ekipa halo servisu kada loron ho másimu,” nia hateten.

Entretantu, tuir dadus ofisiál husi Portál Autoridade Munisipál Likisá, totál proposta orsamentu ba tinan fiskál 2026 hamutuk $8.468.045,00.

Nia dehan, montante ba 2026 ne’e sa’e kompara ho proposta orsamentu tinan 2025 nian ne’ebé hamutuk $7.570.984,00.

Dadus husi Autoridade Munisipál Likisá hatudu mós alokasaun espesífiku ba projetu sira tuir setór iha 2026 hamutuk $1.169.264,00, ne’ebé kobre postu administrativu haat mak hanesan Bazartete, Likisá, no Loes.

Jornalista : Hortêncio Sanchez

Editór     : Cancio Ximenes

Publisidade

Leave a Reply

Latest Post

error: Content is protected !!