DILI, 08 fevereiru 2021 (TATOLI)-Defensor Públiku Jerál, Câncio Xavier, informa mezmu ho rekursu no fasilidade limitadu, maibé sei koloka ofisiál justisa atu halo vizita regular ba iha prizaun hodi haree besik liután kliente sira ne’ebé ninia kazu hetan asisténsia hosi servisu defensoria.
Câncio Xavier, dehan vizita regular ne’e Defensoria Públika uluk halo tiha ona, maibé tanba iha problema transporte limitadu tanba ne’e tinan ne’e tau ona orsamentu atu halo akizisaun karreta foun hodi bele apoiu liután servisu iha terrenu.
Notísia Relevante : DP menus rekursu difikulta vizita regular ba prizaun
Nia hateten, mezmu ho rekursu no fasilidade limitadu, maibé servisu defensoria kontinua presta servisu fó asisténsia lejítimu ba sidadaun hotu, tanba ne’e sei koloka ofisial justisa no mós karik iha urjénsia defensór sira bele ba halo vizita regular ba prizaun sira.
“Ami atu ba julgamentu movel iha difikuldade ho transporte satan atu ba vizita prizaun tanba ne’e espera karreta ne’e iha ona bele apoiu liután ofisial justisa no mós karik iha urjénsia defensór sira bele vizita,” Câncio Xavier, hateten ba Agência TATOLI, iha Dili, segunda ne’e.
Nia haktuir, regulármente iha 2018, 2019 ativu halo vizita kada semana, maibé tanba iha karreta operasionál hetan avaria nune’e labele halo operasaun regular iha prizaun sira.
Câncio Xavier, dehan iha tinan ne’e prevee ona orsamentu liuhosi bens no servisu iha ministériu justisa ne’ebé defensoria públika tutela ba sei halo akizisaun ba karreta rua.
Nia mós prefere Defensoria Públika presiza jere rasik ninia autonomia finanseira no administrativa, nune’e bele rezolve difikuldade sira ho neineik no beibeik sai di’ak liután.
Jornalista : Nelson de Sousa
Editór : Francisco Simões
