PCIC asegura tan ema na’in-110 iha Bebonuk suspeitadu envolve prátika online scam
DILI 08 Jullu 2026 (TATOLI)–Polísia Sientífika Investigasaun Kriminál (PCIC, sigla portugéz), Kuarta ne’e, maizumenus kuaze tuku 00:00, asegura sidadaun Xina no Kambódia hamutuk na’in-110 ne’ebé suspeitadu halo prátika online scam iha uma ida, ne’ebé lokaliza área Bebonuk, Postu Administrativu Dom Aleixo, Munisípiu Dili.
Investigadór Xefe PCIC, Octávio da Costa Araújo, relata, ekipa PCIC serbisu hamutuk ho órgaun investigasaun, instituisaun intelijénsia sira seluk hodi akompaña no tuir sidadaun estranjeiru sira, nune’e identifika katak sira halo atividade jogu ilísitu no burla informátika.
“Husi informasaun durante fulan-ida nia laran, entaun ohin konsege ita infiltra tama iha laran, ita konsege kaer sira ein fraglante delitu. Ita halo detensaun ba sira. Provizóriu ita identifika sira ne’e iha purvolta 100-ital pesoas,” Investigadór hateten ba Jornalista sira iha Bebonuk, Kuarta ne’e.
Notísia relevante : PNTL asegura sidadaun estranjeiru na’in-29 iha Manleuana suspeitadu online scam
Sidadaun estranjeiru kompostu husi xineza na’in-99 no kambodianu na’in-11.
“Sasán sira ne’ebé investigadór sira rekolla hanesan komputadór ne’ebé mak sira uza ba atividade burla, osan nomós ekipamentu sira seluk. Tanba kalan boot liu ona ita asegura sira iha fatin hodi halo identifikasaun, pois aban mak ami sei relata ekipamentu saida-saida inklui montante osan hira ma ita halo apreensaun,” nia akresenta.
Investigadór dehan, PCIC sei halo identifika kle’an ba uma-na’in inklui jerente ba atividade ne’e tanba sidadaun 110 ne’e nia pasaporte iha ema ida mak kaer no ema ne’e PCIC identifika ona.
Antes ne’e, iha loron hanesan iha oras atu ba meiu-dia, Autoridade Seguransa asegura sidadaun estranjeiru na’in-29 iha Aldeia Lemokari, Suku Manleuana, Postu Administrativu Dom Aleixo, Munisípiu Dili tanba suspeitadu envolve atividade online scam.
Jornalista : Natalino Costa
Editora : Julia Chatarina
