DILI, 11 marsu 2021 (TATOLI)—Diretór Ezekutivu Serbisu Ambulánsia Emerjénsia no Médiku, Horácio Sarmento, hateten durante ne’e Governu liuhosi Ministériu Saúde (MS) uza ambulánsia rua hodi halo transportasaun ba pasiente COVID-19, ba sala izolamentu.
“Iha ambulánsia rua, ida iha Vera Cruz no ida iha Tasi-tolu,’’ Horácio Sarmento hateten ba jornalista Agência Tatoli iha kna’ar fatin Caicoli, kinta ne’e.
Notísia Relevante:SS-CIGC deteta-tan pozitivu 12 iha Dili, rua iha Covalima
Nia esplika, ambulánsia rua ne’e uza duni hodi halo transportasaun ba pasiente COVID-19 hosi munisípiu ka Dili laran, bainhira presija.
Bainhira tula ona pasiente COVID-19, nia hatutan, motorista-sira mós halo kuarentena loron 14 atu nune’e prevene virus ne’e labele da’et ba ema seluk.
Oras ne’e daudaun, Governu koloka ema na’in-tolu ba kada ambulánsia, kompostu hosi enfermeiru-ida, médiku-ida no motorista-ida.
“Signifika, ambulánsia rua ne’e iha ema na’in-neen mak daudaun ne’e halo hela operasaun atu evakua pasiente COVID-19. Bainhira ekipa ida tama kuarentena, ita iha ekipa ida seluk tama kedan hodi kontinua halo atendimentu,” nia subliña.
Ekipa rotasaun ne’e iha pakote tolu, pakote ida ba izolamentu, ida seluk ba kuarentena no ida seluk deskansa.
“Agora pakote ida ne’ebé iha izolamentu no kuarentena loron 14 sei halo teste no bainhira rezultadu negativu, sira sai ba hamutuk ho família, no loron tolu ka haat deskansa tiha, depois sira tama fila-fali serbisu, nunee ida izolamentu ne’e ba fali kuarentena,” nia esplika kona-bá mekanizmu rotasaun.
Grupu tolu ne’e, totál ema na’in-sia no oras ne’e daudaun Ministériu Saúde planeia atu halo tan rekrutamentu ba ema na’in 18.
Governu mós iha ona planu atu aumenta tan ambulánsia tanba iha ona transmisaun lokál, maibé bainhira tama iha situasaun emerjénsia ruma, Minstériu sei koordena atu utiliza de’it karreta multifunsaun-sira ne’ebé distribui ona ba Munisípiu-sira foin lalais ne’e.
Notísia Relevante:MS distribui ambulánsia 11 ba Munisípiu sanulu
Jornalista: Felicidade Ximenes
Editór: Cipriano Colo
