DILI, 23 marsu 2021 (TATOLI)—Diretór Ezekutivu Servisu Autónomu Medikamentu no Ekipamentu Saúde (SAMES), Santana Martis, hateten stock nasionál aimoruk iha armazen Kampu Alor hahú manus maibé daudaun iha hela prosesu aprovizionamentu.
“Ami rekoñese katak agora stock iha de’it 30%, ne’ebé bele fó impaktu ba atendimentu no fasilidade ba pasiente, maibé ami sei halo esforsu hodi rezolve,” Diretór Ezekutivu SAMES hateten iha Aeroportu Internasionál Prezidente Nicolau Lobato, tersa ne’e.
Aimoruk ne’ebé daudaun ne’e sei iha hela armazen SAMES falta 452 item maibé aimoruk sira ne’e rai keur ona.
Maski nune’e, parte SAMES hahú halo ona prosesu aprovizionamentu iha tinan ne’e.
“Prosesu aprovozionamentu halo ona, ami hahú selu ona tanba orsamentu aprova sedu, espera katak iha fulan ida ka rua ne’e ita bele kobre ona stock ida menus,” nia akresenta.
Daudaun stock aimoruk ne’ebé iha tinan 2020 la sufisiente atende moras sira seluk.
”Prosesu aprovizionamentu kontinua la’o maibé difikudade ida maka oinsá atu lori produtu mai rai-laran, dala ruma komprimisiu kompañia sira fulan rua to’o tolu, to’o tiha sira buka transporte hanesan ró atu lori mai mak atraza, entaun sempre adia, ida-ne’e maka difikudade ita hasoru,” nia hatutan.
Nia dehan, Governu kontratu ho kompañia internasionál hosi Portugal, Dinamarka, Olanda ne’ebé aimoruk mai hosi India, Xina, Baglandesh no balun hosi Indonézia.
“Ami esforsu atubele asegura iha situasaun agora ne’ebé laiha movimentu no provoka moras barak, ami tenta nafatin atu aimoruk sira bele tama iha tempu besik,” Diretór tenik.
Jornalista: Natalino Costa
Editora: Julia Chatarina
