DILI, 08 juñu 2021 (TATOLI)—Ministru Obra Públika (MOP), Salvador Eugênio Soares dos Reis Pires, informa, daudaun ne’e konsultór sira sei halo estudu viabilidade ba reviltalizasaun Aitarak-laran no planu urbanu.
“Revitalizasaun Aitarak-laran no projetu abitasaun ho presu asesível halo hela estudu viabilidade no seidauk finaliza, bainhira hotu maka sei tama faze estudu dezeñu detalladu hafoin ba ezekusaun obra,” Ministru Salvador informa ba Agência TATOLI, iha ninia knaar fatin Caicoli, Dili, tersa ne’e.
Notísia relevante: CAFI aprova programa revitalizasaun no abitasaun konstrui uma unidade 2.000
Tuir governante ne’e, tinan 2019 liubá, finaliza estudu pre-viabilidade projetu revitalizasaun no abitasaun, ne’ebé ho modalidade Parseria Públika Privada (PPP).
Ministru dehan, planu no polítika VIII Governu iha área abitasaun no urbanizmu maka atu organiza di’ak liután kapitál Dili, nune’e Governu esforsu atu harri uma ba komunidade ho organizadu, presu esesível ba sidadaun ho rendimentu kiik no seguru ba mudansa klimátika.
“Estudu rua ne’e simultáneamente la’o hamutuk, nune’e bainhira ita hakarak muda komunidade, bele akomoda ba sira ne’ebé planu ona bele mantein nafatin, maibé sei bazeia ba estudu viabilidade no dezeñu detalladu,” nia akresenta.
Iha 22 dezembru 2020, Konsellu Ministru deside Governu reprezenta hosi MOP no Ministériu Finansa hamutuk Konsultór International Finance Corporation (IFC) foka inisia estudu viabilidade hodi harii uma foun hamutuk unidade 2000 iha área Hali-dolar, suku Hera, munisípiu Dili.
“Ami no Ministériu Finansa asina akordu ho IFC, no agora sira promove hela no halo rekrutamentu halo estudu ne’e rasik ne’ebé liga mós iha revitalizasaun Aitarak-laran,” nia hatutan.
Tuir nia, fatin identifikadu atu harii uma foun hanesan área Hali-dolar, Merkadu tuan Comoro no sei iha negosiasaun kampu futeból Kulau Becora, ne’ebé tuir planu sei akumula uma kuaze 2.000 to’o 4.000.
Ministru mós klarifika, uma ba vítima dezastre naturál la inklui iha estudu viabilidade, maibé ministériu kompetente hahú prepara atu halo intervensaun.
“Ministru Planu no Ordenamentu (MPO) no Ministériu Administrasaun Estatál (MAE) mak haree abitasaun temporária ba vítima dezastre naturál iha loron 04 abríl,” nia hatutan.
Jornalista: Florêncio Miranda Ximenes
Editora: Julia Chatarina
