DILI, 18 juñu 2021 (TATOLI)—Hahú hosi janeiru to’o maiu, Ministériu Saúde (MS), liu hosi Diresaun Nasionál Kontrolu Moras (DNKM) rejista moras dengue hamutuk 545, no hosi númeru ne’e iha na’in-tolu mak mate.
Númeru dengue ne’ebé iha rejistadu mai hosi munisípiu 11 no munisípiu Aileu ho Rejiaun Administrativa Espesiál Oe-cusse Ambeno (RAEOA) mak laiha.
Notísia relevante:Kombate dengue presija konsiénsia komún
Munisípiu 11 ne’ebé rejista kazu dengue mak hanesan munisípiu Ainaro iha kazu hitu, Baucau 56, Bobonaru 33, Covalima 15, Dili 368, Ermera 13, Lautím iha hitu, Liquica iha haat, Manatuto 19, Manufahi 15 no Viqueque ualu.
“Na’in-tolu ne’ebé mate tanba dengue mai hosi munisípiu Baucau, Manufahi no Liquiça,” Diretora Nasionál Kontrolu Moras, Josefina Clarinha João, hateten ba jornalista Agência Tatoli iha knaar-fatin Lahane, sesta ne’e.
Josefina Clarinha João apela ba ema hotu atu kontinua hamoos foer-sira iha uma oin, lata mamuk ne’ebé iha tenki hakoi no tenke hatoman aan atu moris iha ambiente ne’ebé moos.
Oras ne’e daudaun DNKM ho esforsu másimu serbisu makaas atu luta kombate dengue liuliu fó kompeténsia ba Serbisu Saúde munisipál-sira hodi halo kampaña kona-bá moris saudável.
Jornalista: Felicidade Ximenes
Editór: Cipriano Colo
