DILI, 28 juñu 2021 (TATOLI)—Kompañia Star King Lda, oferese hahán pakote hamutuk kaixa 200 ba Komandu FALINTIL-Forsa Defeza Timor-Leste (F-FDTL).
Apoiu ne’e oferese direta hosi Diretór Kompañia Star King, Lay Siu Hing ba Brigadeiru Jenerál F-FDTL, Calisto dos Santos ‘Coliati’ iha edifísiu Komandu Jenerál, F-FDTL Fatuhada, segunda ne’e.
Notísia relevante:Komandu F-FDTL ensera misaun apoiu umanitáriu iha Tasi-Tolu
Lay Siu Hing, hateten hahán pakote ne’e oferese gratuita atu tulun Komandu F-FDTL, hodi apoia membru sira ne’ebé hala’o serbisu iha Dili, munisípiu no pontu entrada.
Nia dehan, hahán ne’e ho pakote ne’ebé bele konsumu iha dader, loro-manas no kalan hodi bele hala’o seguransa durante implementasaun Estadu emerjénsia.
“Ne’e hanesan ajudu umanitáriu bai ta-nia forsa sira ne’ebé hala’o seguransa iha liña fronteira,” Lay Siu Hing hateten ba jornalista-sira iha Kuartél Jenerál F-FDTL, Fatuhada.
Iha fatin hanesan, Brigadeiru Jenerál F-FDTL, Calisto dos Santos ‘Coliati’ agradese ba apoiu ne’ebé oferese hosi Star King, ba nesidade forsa armada-nian.
“Ami agradese no haksolok, tanba kompañia Star King bele ajuda Komandu F-FDTL hodi ajuda ita-nia forsa-sira ne’ebé hala’o serbisu iha fronteira,” nia agradese.
Tuir planu iha tempu badak, Komandu F-FDTL sei distribui ai-han hirak ne’e ba membru destakadu iha pontu entrada Timor-Leste.
Jornalista: Eugénio Pereira
Editór: Cipriano Colo
