DILI, 03 Juñu 2026 (TATOLI)—Inspesaun Jerál Estadu (IJT), hahú husi 2026 to’o iha 2026 ne’e, rejista traballadór ne’ebé hetan asidente iha servisu fatin hamutuk 69 ne’ebé kompostu husi tipu tolu (3) hanesan kanek kma’an, kanek todan no mate.
Inspetór Inspesaun Jerál Traballu, Frederico Pereira de Matos, hateten totál husi asidente traballadór na’in-69 ne’e kompostu husi kanek kma’an hamutuk 32, kanek todan 20, no mortalidade (mate) hamutuk 17 no traballadór sira ne’e barak liu mak servisu iha área konstrusaun.
“Ami halo rejistrasaun ba traballadór ne’ebé hetan asidente iha servisu fatin entaun iha 2016 ami rejista traballadór na’in-rua (2) mak mate. Iha 2017 kanek todan na’in-ida (1). Iha 2018 kanek kma’an na’in-rua (2), kanek todan na’in-ida (1), mate na’in-rua (2). Iha 2019 kanek kma’an na’in-rua (2), kanek todan na’in-ida (1). Iha 2020 mate na’in-rua (2). Iha 2021 kanek kma’an na’in-rua (2), kanek todan na’in-rua (2), mate na’in-rua (2). Iha 2022 kanek kma’an na’in-rua (2), kanek todan na’in-haat (4). Iha 2023 kanek kma’an na’in-hitu (7), mate na’in-haat (4). Iha 2024 kanek kma’an na’in-rua (2), kanek todan na’in-tolu (3) no mate na’in-ida (1). Iha 2025 kanek kma’an na’in-14, kanek todan na’in-hitu (7), mate na’in-tolu (3). Iha 2026 kanek kma’an na’in-ida (1) no kanek todan na’in-ida(1),” Inspetór ne’e relata ba Agência Tatoli iha nia kna’ar fatin Hudi Laran, ohin.
Atu evita asidente iha servisu fatin, nia dehan, sira estabelese lei nú. 2/2025 husi diploma ministeriál ne’ebé ko’alia kona-ba sinalizasaun seguransa saúde no ijiéne iha servisu fatin.
“Ami halo inspesaun no sensibiliza tuir ezijénsia lei nian. Nune’e kompañia sira tenke kumpre rekezitu hanesan prepara ekipamentu protesaun individuál ba traballadór sira hanesan luvas, kapasete, oklu soldadura, sepatu botas, liuliu sira-ne’ebé servisu iha área kontrusaun. Tanba, asidente bele akontese naturalmente no ida seluk mak laiha kontrolasaun,” nia esplika.
Enkuantu, traballadór hirak ne’ebé hetan asidente ne’e empreza indemniza ona sira ho montante totál $96.474 ne’ebé kompostu husi 2016 nian hamutuk $16.000, 2017 hamutuk $11.000, iha 2018 hamutuk $14.890,2019 hamutuk $1.844, tinan 2020 hamutuk $2.500, iha 2021 hamutuk $17,500, iha 2022 hamutuk $200, iha 2023 hamutuk $758, iha 2024 hamutuk $9.200, iha 2025 hamutuk $21.582 no iha tinan 2026 hamutuk $1.000.
Jornalista : Alexandra da Costa
Editór : Cancio Ximenes
