DILI, 22 Juñu 2026 (TATOLI) – Reuniaun Konsellu Ministru estraordinária ohin aprova votu kondolénsia no deside dekreta lutu nasionál ba maktoban eis-Prezidente Repúblika Demokrátika Timor-Leste, no Prezidente Frente Revolusionária Timor-Leste Independente (FRETILIN), Francisco Guterres “Lú Olo”, durante loron hitu.
Lutu loron hitu ne’ebé Governu dekreta sei observa lutu nasionál iha nasaun tomak, hahú husi tuku 15h00 loraik iha loron 22 fulan-Juñu to’o meia-noite iha loron 28 fulan-Juñu, ho bandeira nasionál ne’ebé hasa’e iha meia-mastru iha edifísiu públiku sira hotu, inklui embaixada sira, konsuladu sira no reprezentasaun sira seluk Estadu nian iha rai-li’ur, nomós iha ró sira Estadu nian.
Eis-Prezidente Lú Olo nu’udar figura ida ne’ebé iha influénsia iha luta ba libertasaun nasionál.
Francisco Guterres “Lú Olo” mate ho idade 71 iha Ospitál Prince Court iha Kuala Lumpur, Malázia, iha ne’ebé nia simu hela tratamentu médiku intensivu. Moris iha Ossú, iha munisípiu Viqueque, iha loron 7 fulan-Setembru tinan 1954, nia dedika parte boot husi nia moris ba luta ba libertasaun nasionál, tanba kaer ona responsabilidade oioin iha rezisténsia durante okupasaun indonézia. Hafoin Konis Santana mate iha tinan 1998, nia asume knaar lideransa polítika rezisténsia timoroan nian.
Iha tinan 2001, nia eleitu nu’udar Prezidente Asembleia Konstituinte, órgaun ne’ebé responsavel ba hakerek Konstituisaun Repúblika. Nia hala’o knaar nu’udar Prezidente Parlamentu Nasionál entre tinan 2002 no 2007 no eleitu nu’udar Prezidente Repúblika iha tinan 2017, kargu ne’ebé nia kaer to’o tinan 2022.
Francisco Guterres “Lú Olo” kondekoradu ho Kolár Orden Timor-Leste nian iha tinan 2009, Kolár Boot Orden Timor-Leste nian iha tinan 2022, no Kolár Boot Orden Prínsipe Enrique Navegadór nian, ne’ebé fó husi Repúblika Portugál iha tinan hanesan, hodi rekoñese ninia kontribuisaun ba Timor-Leste no hametin relasaun entre nasaun rua ne’e.
Ho desizaun ida-ne’e, Governu fó omenajen ba membru proeminente luta libertasaun nasionál nian no hato’o sentidu kondolénsia kle’an ba nia feen, oan sira no família sira seluk, ba FRETILIN no ba povu timoroan tomak, hodi rekoñese legadu dedikasaun no serbisu ne’ebé Francisco Guterres “Lú Olo” husik hela ba konstrusaun Timor-Leste ida ne’ebé livre, demokrátiku no soberanu.
Notísia relevante: Antigu Prezidente Lú Olo nia mate-isin sei simu ho parada militár iha aeroportu Komoro
Jornalista: Arminda Fonseca
Editora: Maria Auxiliadora
