DILI, 22 Juñu 2026 (TATOLI)-Sekretáriu Estadu Veteranu, César dos Santos da Silva, informa katak Governu daudaun halo hela preparasaun atu simu maktoban eis-Prezidente Repúblika, Francisco Guterres “Lú Olo”, ne’ebé sei to’o iha Aeroportu Internasionál Komoro, Dili, aban pur volta tuku 06h00 dadersán.
Tuir nia, bainhira maktoban to’o iha aeroportu, sei simu ho parada militár antes akompaña bá nia rezidénsia iha Faról, Dili.
César dos Santos dehan preparasaun ne’ebé Governu halo ho koordenasaun hamutuk ho família. Inisialmente, iha opiniaun balun atu lori mate-isin bá munisípiu Vikeke, postu administrativu Ossú, maibé desizaun ikus husi faluk, oan-ki’ak sira mak determina atu tau maktoban iha rezidénsia Faról no depois deskansa ikus iha Jardín Eroi, Metinaru.
“Família mós konkorda fali desizaun ne’e, pois mak ita haree sekuénsia sira tuirmai. Preparasaun ne’ebé parte Governu halo mak aban maktoban to’o mai sei simu husi parada militár iha Aeroportu Internasionál Komoro, Dili, hotu lori mai deskansa iha ninia rezidénsia Faról”, Cesar dos Santos relata.
Nia akrexenta katak desizaun ba loron atu hakoi seidauk iha tanba família sei konsidera aspetu oioin, maibé prosesu ne’e labele kle’ur liu. “Desizaun hakoi ne’e bele to’o sábadu, la’e la to’o”, nia dehan.
Iha parte seluk, membru família husi maktoban nian, Domingos Guterres, hateten katak antigu Prezidente Lú Olo nia mate la’ós de’it lori tristeza ba família, maibé mós ba nasaun, povu no partidu FRETILIN tomak.
Nia esplika katak família daudaun prepara de’it kondisaun mínima atu simu maktoban, maibé desizaun detallada sira seidauk foti, tanba sei hein espoza maktoban nian.
Nia hateten katak antes bá Malázia atu halo tratamentu saúde, ex-Prezidente la ko’alia barak no preokupa de’it kona-ba ninia kondisaun saúde.
“Bainhira ami rona informasaun nia hakotu iis, nu’udar umanu ami sente lakon boot ida-ne’e, la’ós ba ami família maibé mós ba ita hothotu, inklui povu tomak triste tanba lakon líder di’ak ida. Antes bá Malázia maktoban halo tratamentu saude iha HNGV no rekomendasaun husi junta médika husi HNGV maka haruka bá Malázia”, nia hato’o.
Lembra katak antigu Prezidente Repúblika no antigu Prezidente Asembleia Konstituinte, Francisco Guterres “Lú Olo”, termina ninia peregrinasaun iha mundu iha loron domingu (21/06), iha Ospitál Prince Court, Kuala Lumpur, Malázia.
Notísia relevante: Aban, família halo transladasaun mate-isin Lú-Olo husi Malázia mai Dili
Jornalista: Arminda Fonseca
Editora: Maria Auxiliadora
