DILI, 23 Juñu 2026 (TATOLI) – Arsebispu Akidioseze Metropolitana Dili, Don Virgílio Kardeál do Carmo da Silva, SDB, informa katak Bispu Dioseze Baukau, Don Leandro Maria Alves, mak sei prezide misa requiem ba antigu Prezidente Repúblika, Francisco Guterres “Lú Olo”, ne’ebé sei selebra, iha sesta-feira, iha Igreja Katedrál, Dili.
Don Virgílio dehan família sira husu nia atu prezide misa ba maktoban, maibé nia parte labele tanba aban, 24 Juñu, sei hala’o viajen bá Roma hafoin hetan konvite husi Amu Papa hodi partisipa reuniaun ne’ebé Papa rasik sei lidera.
“Kona-ba misa, ohin, família husu ona. Ita deside Bispu Baukau mak sei prezide misa requiem iha sesta-feira tuku 11h30 iha Igreja Katedrál, Dili. Ha’u ata labele tanba aban dezloka bá Roma, tanba Amu Papa konvida atu partisipa reuniaun iha Roma. Maibé ami na’in-tolu mai tiha ona, Amu Leandro ho sira seluk prontu selebra misa ikus ninian iha sesta”, amu Kardeál hateten iha ámbitu presta omenajen ba matebian antigu Xefe Estadu, iha Faról, Dili.
Iha serimónia presta omenajen ne’e, Konferénsia Epikopál Timorense (CET, sigla portugés) reprezenta husi bispu na’in-tolu, Arsebispu Akidioseze Metropolitana Dili, Don Virgílio Kardeál do Carmo da Silva, SDB, Bispu Dioseze Baukau, Don Leandro Maria Alves, no Bispu Dioseze Maliana, Don Norberto do Amaral, hamutuk ho relijiozu sira seluk.
Hafoin presta omenajen Don Virgílio hateten katak povu timoroan tomak, liuliu sarani katólika sente triste tanba lakon eis-Prezidente Repúblika Lú Olo.
Lori sarani katólika nia naran, Kardeál hato’o agradese ba sakrifísiu no kontribuisaun hotu ne’ebé Prezidente Lú Olo halo ona ba rai ida-ne’e to’o ukun rasik-an.
“To’o ukun rasik-an mós knaar hotu ne’ebé nia lori harii nasaun ida-ne’e, entaun hothotu iha obrigasaun atu agradese ba nia serbisu hotu ne’ebé nia halo. Ami mai momentu hanesan ne’e reza ba nia no ba família, liuliu espoza no oan sira ne’ebé lakon sira-nia oan. Iha momentu difísil ida-ne’e, ita mai hatudu solidariedade, reza ba sira, nune’e iha momentu susar ida-ne’e sira iha forsa nafatin hasoru momentu triste ida-ne’e”, Arsebispu hateten.
Tuir nia, eis-Prezidente Repúblika Lú Olo nu’udar figura ida importante ba ema hotu, tanba nia kontribuisaun durante luta no iha prosesu dezenvolvimentu nasaun nian, ne’ebé ema hotu bele haree no sente.
Notísia relevante: Lú Olo entrega hela Timor-Leste ba timoroan sira luta kombate mukit-dezempregu
Jornalista: Arminda Fonseca
Editora: Maria Auxiliadora
