DILI, 23 Juñu 2026 (TATOLI)—Antigu Prezidente Repúblika, Francisco Guterres Lú Olo, kontribui luta ba libertasaun nasionál durante tinan 24 nia laran iha ai-laran, no iha Domingu (21/06) ne’e luta-na’in Lú Olo hakotu iis hodi entrega hela Timor-Leste ba timoroan sira luta atu kombate mukit no dezempregu.
Notísia Relevante: Taur Matan Ruak: “Obrigadu Maun Lú, sira la mesak no ami hotu iha sira-nia sorin”
“Ita banati tuir nafatin, lori ita-nia nasaun ba oin. Ita hotu hamutuk kombate ki’ak, dezempregu, mijeria iha ita-nia rain. Tanba ita hetan tiha vitória ba ukun an maibé ba povu nia moris di’ak ne’e seidauk. Ne’ebé, obrigadu ba maun Lú, ami hotu ne’ebé mai husi ai-laran, espresa ami-nia sentidu kondolénsia ba fundadór nia kaben no nia oan sira. Sira la mesak, ami hotu iha sira-nia sorin, obrigadu,” Taur Matan Ruak hateten ba jornalista sira iha maktoban nia rezidénsia iha Faról, ohin.
Nia relata, mensajen sira-ne’ebé mak maktoban husik hela hanesan fanu ema hotu atu labele dukur tanba buat ne’ebé mak la kontribui ba dezenvolvimentu ne’e tenke halakon.
”Ne’e, hela ba ita moris sira atu hatutan. Buat mensajen ne’ebé nia fó hela, konserteza nia fanu ita para labele dukur, labele toba, hadeer nafatin. Buat hotu ne’ebé ladi’ak, la kontribui ba dezenvolvimentu ita-nian, ita tenke halakon,” nia dehan.
Antes ne’e, Antigu Prezidente Repúblika, Francisco Guterres Lú Olo, hateten nia la gosta liman-lais no husu para saida mak povu nian ne’e tenke respeitu hanesan povu nian, se lae ida-ne’e hanesan prátika korrupsaun ida.
“Ha’u-nian mak ful-fulan Estadu fó ba ha’u, tuir lei mak ida-ne’e. Buat ne’ebé ema maioria nian, ne’e ema maioria nian. Se ful-fulan ita han iha ita-nia bikan, ita labele ba han tan povu ninian, ne’e labele. Tanba ne’e mak ema dehan korrupsaun ne’e, ida ne’e mak ladi’ak. Korrupsaun ne’e tenke hotu, ne’e para lori ita-nia rain ba oin,” Lú Olo hateten.
Notísia Relevante: Taur Matan Ruak: “Ha’u despede nia ho hako’ak ikus iha Malázia”
Jornalista : Felicidade Ximenes
Editór : Cancio Ximenes
