DILI, 23 Juñu 2026 (TATOLI)—Kadáver Antigu Prezidente Repúblika, Francisco Guterres “Lú Olo” to’o iha rezidénsia iha Faról, iha tuku 08h18, akompaña husi komunidade atus ba rihun husi Aeroportu Internasionál Prezidente Nicolau Lobato to’o iha rezidénsia, família sira simu ho matan-ween.
“Obrigadu ba Maun Lú..! Ami hotu ne’ebé mai husi ai-laran, ami espresa ami-nia sentimentu kondolénsia ba nia espoza no nia oan sira. Sira la mesak, ami hotu iha sira-nia sorin,” Antigu Prezidente Repúblika no Primeiru-Ministru, Taur Matan Ruak, hateten ba jornalista sira hafoin hato’o sentidu kondolénsia ba família oan-ki’ak sira, ohin.
To’o iha rezidénsia Faról, maktoban nia oan no espoza tanis to’o dezmaia (monu), nune’e familia sira simu ho tanis halerik, no simu hodi haktuir prosesu kultura molok lori kadáver tama ba uma laran.
Iha rezidénsia, akompaña husi Sekretariu Jeral Partidu Fretilin, Mari Akateri, Eis Prezidente Republika Taur Matan Ruak ho nia oan, Tenente Jeneral Lere Anan Timor ho nia espoza, membru parlamentu nasional, membru Governu sira, veteranu no vetarana sira, membru asembleia konstituante, madre no padre sira no entidade sira seluk.
Irman Carmelita, Odete Belo Victor, hateten sira hahú halo ona presta omenajen ba maktoban ho nia familia husi entidade sira-ne’ebé mak mai partisipa.
“Ha’u hanesan irman kongresaun husi Carmelita sente triste banhira rona eis prezidente Republika Francisco Guterres Lú Olo fila hikas ba aman Maromak. Bainhira hau rona dehan eis PR la iha ona ha’u sente triste tanba durante sei moris ema ne’e valoriza tebes ninia povu. Bainhira nia lakon derrepente sente hanesan fuan moras tebes,” Odete Belo Victor dehan ba TATOLI iha residénsia Farol. ohin.
Jornalista : Felicidade Ximenes
Editór : Cancio Ximenes
