DILI, 23 Juñu 2026 (TATOLI)-Kadáver eis-Prezidente Repúblika Francisco Guterres “Lú Olo” to’o iha Aeroportu Internasionál Prezidente Nicolau Lobato Komoro, Dili, pur volta tuku 6:34 ne’ebé akompaña husi espoza maktoban Cidália Mouzinho, oan ki’ak na’in-haat, família balun, inklui Sekretáriu-Jerál Partidu FRETILIN, Marí Alkatiri.
Prosesu hatún kadáver husi aviaun Aero Dili pur volta tuku 6:59 no hetan akompañamentu husi Primeiru-Ministru Interinu, Mariano Assanami Sabino, ho militár na’in-sanulu hodi lori bá iha parada fatin no entrega fali ba militár na’in-ualu hodi simu ho parada hafoin ne’e lori mate-isin bá iha fatin ne’ebé Governu prepara ona karru funeráriu.
Iha xegada kadáver ne’e mós simu direita mós husi família maktoban, reprezenta Prezidente Repúblika Xefe Casa Sivíl, eis-titulár Taur Matan Ruak, membru Governu, membru Parlamentu Nasionál, Tenente-Jenerál Falur Rate Laek, veteranu sira hanesan Lere Anan Timur, kuadru partidu FRETILIN no povu sira, inklui simpatizante partidu FRETILIN nian.
Aeroportu Komoro sai sasin ba matan-been ba xegada maktoban eis-Prezidente Repúblika Francisco Guterres “Lú Olo”. Situasaun iha terrenu halo silénsiu bainhira aviaun to’o no família sira simu ho tanis bainhira espoza maktoban Cidália Mouzinho ho oan ki’ak sira tun husi aviaun hodi hamriik hamutuk ho família sira.
Momentu ne’e halo família no populasaun ne’ebé hein tanis. Família sira haku’ak espoza maktoban ho oan ki’ak sira tanis no fó korajen, espoza mós tanis haku’ak família sira. Oan feto ikun husi maktoban kaer rasik nia aman nia retratu hamriik iha oin.
Tanis halerik ho liafuan “maun la’o dook loos ona, ami hanoin ba konsulta di’ak para fila mai, maibé bá ho hamnasa, fila lori triste ba família”.
I
ha situasaun ne’e, maktoban nia ferik-oan Cidália lori nia liman-loos nafatin hamaus nia hirus-matan hodi hatudu ninia forsa hanesan inan ne’ebé forte iha oan sira-nia oin.
Bainhira kaixaun ne’ebé maktoban iha laran liu sira-nia oin, oan-ki’ak ho faluk haku’ak malu kaer kaixaun tanis, oan mane na’in-tolu haku’ak metin sira-nia inan, no inan haku’ak metin oan feto ikun.
Hafoin ne’e, ema sira ne’ebé marka prezensa iha aeroportu akompaña lori kadáver bá karru funeráriu ne’ebé Governu prepara ona pur volta tuku 07:21 ne’ebé akompaña mós husi Polísia Militár.
Karru funeráriu ne’ebé lori maktoban lori husi militár no iha karreta oin tau kedas bandeira tolu FALINTIL ida ho RDTL rua.
Espoza ho oan feto tuur iha oin no oan mane na’in-tolu ho karreta seluk husi kotuk.
Iha terrenu mós Polisia Nasionál Timor-Leste destaka membru sira halo seguransa másima hahú husi estrada boot to’o aeroportu inklui to’o rezidénsia maktoban iha Faról, Dili.
Tuir observasaun, prezensa simu kadáver antigu Prezidente ne’e iha populasaun lubuk ida maka hein iha li’ur aeroportu nian, husi sira ne’e maioria simpatizante partidu nian ne’ebé sira-nia prezensa iha aeroportu hahú husi tuku 05:00. Sira hotu hein ho matabeen.
Notísi relevante: Komunidade hasai matabeen bainhira kadáver Antigu Prezidente Lú Olo to’o aeroportu
Jornalista: Arminda Fonseca
Editora: Maria Auxiliadora
