Komunidade hasai matabeen bainhira kadáver Antigu Prezidente Lú Olo to’o aeroportu
DILI, 23 Juñu 2026 (TATOLI)–Komunidade entusiazmu hodi hein kadáver Antigu Prezidente Repúblika, Francisco Guterres Lú Olo nian iha Aeroportu Internasionál Prezidente Nicolau Lobato, Komoro, Dili, Tersa dadeer ne’e.
Hosi observasaun ne’ebé TATOLI halo bainhira aviaun to’o Aeroportu Internasionál Prezidente Nicolau iha tuku 6:44, komunidade tantu ferik no katuas, labarik-sira, joven inklui simu ho matabeen ba xegada kadaver eix gerrilleiru ne’e.
Abitante Izolina Oliveira espresa nia sentimentu tanis no triste tanba lakon ema di’ak , matenek, pasiénsia-na’in no hadomi ema hotu ne’e.
“Ami triste tebes bainhira rona antigu Prezidente Repúblika, Saudozu Francisco Guterres Lú Olo hakotu nia peregrinasaun moris iha mundu ida-ne’e. Ida-ne’e sente lakon boot aman di’ak ida, pasiénsia-na’in, matenek no la haree ba ema-nia koor,” nia dehan ho lian kotu-kotu, hodi tahan nia matabeen.
Nia hateten saudozu nia dedikasaun no kontribuisaun tomak ba povu no nasaun valór boot tebes dezde iha ai-laran luta ba liberta rai ida-ne’e no to’o ukun-an.
“Buat ne’ebé ha’u lembra mak ema ne’e fó nia an tomak ba rai ida-ne’e to’o ukun rasik an no nafatin firme kontribui ba dezenvolvimentu nasaun no povu maibé kuitadu Maromak hadomi liu nia no sedu liu,” nia espresa ho oin triste.
Izolina tenik Saudozu Lú Olo líder istóriku, aman ba nasaun Timor-Leste ne’ebé hadomi povu no rai ida-ne’e.
Nune’e mós, Fernanda Gomes da Silva hateten ohin nia to’o sedu iha Aeroportu Internasionál Prezidente Nicolau Lobato iha tuku 4:30 Otl tanba hakarak fó onra no omenajen ba Saudozu Lú Olo.
“Ha’u mai sedu hodi fó omenajen ba ita-nia eroi, aman nasaun nian tanba ho nia dedikasaun no domin ba povu no rai ida-ne’e laiha rohan no laiha kór,” nia dehan.
Líder istóriku ne’e haree ema hotu hanesan no sempre fó prioridade ba povu no nasaun, maibé Maromak nia planu oin seluk nune’e bolu sedu tiha ema laran di’ak ne’e.
Jornalista: Osória Marques
Editór: Xisto Freitas da Piedade
