DILI, 23 Juñu 2026 (TATOLI) – Prezidente Parlamentu Nasionál (PPN), Maria Fernanda Lay, no deputadu sira presta omenajen ba maktoban eis-Prezidente Repúblika, Francisco Guterres “Lú Olo”, iha nia rezidénsia Faról, Dili.
Hafoin presta omenajen Prezidente Parlamentu Nasionál, Maria Fernanda Lay, hateten maktoban Lú Olo nu’udar figura di’ak ba família no nasaun.
“Lú Olo la’ós asset ba família de’it, maibé asset mós ba nasaun. É uma perda para o país, ao Partido, no liuliu ba família. Tanba ba família, nia nu’udar figura ida”, Fernanda Lay hateten ho matan-been.
Nia realsa katak eis-Xefe Estadu nia mate halo povu hotu triste tebes, maibé nia husik ona mundu ne’e no espera katak Maromak bele fó kbiit ba família no oan sira.
“Ha’u preokupa uitoan maibé ha’u hanoin katak espoza iha forsa hodi tau-matan ba oan sira. Estadu tau-matan nafatin ba matebian nia oan sira”, nia hateten ho tanis.
Hodi haktuir katak durante nia mandatu hanesan Prezidente Parlamentu Nasionál, iha lejizlasaun dahuluk nian hanesan asset nasaun. “Ida-ne’e hatudu katak saida mak matebian husik hela ba povu no rai ida-ne’e mak jerasaun sira tuirmai valoriza nafatin esforsu hotu nia halo iha momentu difísil, maibé nia lidera Parlamentu Nasionál”, katak.
Ba Fernanda Lay, memória ida-ne’e hanesan deputadu tenke konsidera nafatin iha prosesu lejizlasaun, liuliu sira-nia atitude tanba nia fó ezemplu di’ak iha momentu ne’ebá.
“Ha’u espera katak nia figura bele inspira ami hodi respeita malu iha Parlamentu Nasionál, ida-ne’e importante tebes. Ha’u fiar katak matebian sei kontente bainhira ami serbisu ho di’ak no mantein demokrasia no kontinua ba preokupasaun povu Timor-Leste nia”, dehan.
Jornalista: Arminda Fonseca
Editora: Maria Auxiliadora
